Donkam jaka 15 acre ban tei skul ia ki riewlum, ong u Myntri

Shillong,25 Risaw:
U Myntri ka sorkar pdeng uba dei ia ka tnad Tribal Affair ka jylla u V.Kishore Chandra Deo haba ai jingkren mynta ka sngi u la ong ba ka long kaba donkam ban pynneh pynsah bad ban iada ia ka jinglong tynrai jong ki riewlum, haba snoh kti ha ki kam pynroi na ka bynta ki riewlum kane ka jylla u Kishore u la kular ba un iarap ban seng ia kiwei ka skul jong ki riewlum ka ka Eklavya, lane kata ka model school hynrei u la ong ba donkam jaka haduh 15 Acre ban tei ia katei ka skul bad u la kyntu ba ia katei ka jaka ban seng iakatei ka skul donkam ban ioh ka jingmynjur na ka sorkar jylla. U la kyntu ruh ba kim dei ban long kiba kyrkieh ban tynruh ia u man ka por ha kaba ia dei bad katei ka jingkular jong u hynrei ki dei ban ailad shuwa ba un ia kren bad ki para MP jong u bad u la tip hi ban leh ia kaba donkam.
U Dr.D.D Lapang u la ong ba u Myntri ka tnad Tribal Affair u V.Kishore Chandra Deo u dei u briew uba aiti na ka bynta ban shakri na ka bynta ki paidbah bad ka ing jong u ruh kumjuh ka dei ka ing kaba ai ka jingshakri ia ki paidbah. “U la long u MP ka Lok Sabha la 5 sien, u MP ka Rajya Sabha shisien, ka lok jong u dei ka Artist , ki khun jong u ki la ioh ka kam ka jam hynrei kim shym la treh ban trei naba ki kwah ban shakri ia u paidbah”ong u Dr.D.D Lapang haba kren shaphang u Deo uba la wan ban jngoh ia ka Tamasa Monolith.
Ka kong Wansuk Syiem , MP ka Rajya Sabha haba ai jingkren ha katei ka sngi ka la ong ba u Deo u dei u riewlum bad u tip khambha ia ka jinglong jingim ki riewlum, ka la ong ba u la leh shibun ki kam pynroi ha ka jaitbynriew kaba ma u wan, ka la kyrpad ba un iarap ban leh eiei ia kane ka jaitbynriew rit paid ki riew lum ha ka jylla. Ka kong Wansuk ka la ong ba u Kishore u dei u riewlum na Araku Valley ka jylla Andhra Pradesh.
U CEM ka KHADC haba ai jingkren kum u khlieh jong ka KHADC u Bah PN Syiem u la ong ba kane ka Tamasa ka dei kum ka jingpynphriang bad ka jingpyni ia ka kolshor bad ka jinglong tynrai ki Khasi khnang ba kiwei pat kin ioh tip ia ka jingriewspah ka kolshor jong ki Khasi.