Ki sengbhalang kiba iakhih ban dawa pyntreikam ia ka Inner Line Permit (ILP) ha kane ka jylla Meghalaya, ka la ioh ia ka jingkyrshan na ki samla ka jylla Mizoram kawei na ki jylla ha kane ka thain North East ka India ba pyntreikam ia ka ILP.
Ka seng ki samla pule ka Mizoram Students’ Union (MSU) Shillong Unit ka ai jingkyrshan mynsiem (moral Support) ia ka jingdawa jong ki sengbhalang ha kane ka jylla ban pyntreikam ia ka Inner Line Permit (ILP).
Ha ka jingtwad jingmut u Rupang hynne ka sngi na ki nongialam ka seng samla pule kaba don ha Shillong, ki la ong ba ka ILP ka long kaba donkam ban iada ia ka jingwan rung kyrthep ki bar jylla bad ruh kan iada ia ka jingwan knieh long trai khlieh ki briew ba nabar ha ki kam ki jam kum ha ka khaii ka pateng bad khamtam ban iada ia ka jingkyrpang ka jaidbynriew.
“Hooid, donkam ia ka ILP ha Meghalaya, bad ngi na ka liang ka MSU Shillong Unit, ngi ai jingkyrshan ia ka jingdawa ki sengbhalang ia ka ILP ha Meghalaya”, la ong ki nongialam ka MSU.
Kine ki nongialam ka MSU ki la pynpaw ia ka jingma namar ka jingwantuid ki briew na ka ri thor sha kane ka jylla khamtam ha nongbah Shillong ha kaba bun na ki briew khamtam ki dkhar ki la kharoi bha ha ka jylla.
“Bun ki jaka ha sor Shillong kum ha Khyndai Lad (Police Bazar) bad ha kiwei ki jaka, la kynrei da ki dkhar”, la ong u Secretary u Lalthakima Chhngte bad u la bynrap ba lada treikam ka ILP baroh ki ba shu wan shong beain ha kane ka jylla ki hap ban phet noh sha la shnong lada kim don ka ILP.
Kumjuh u Vice President ka MSU Shillong Unit u B Lalrintluanga u la ong ba ka ILP ha ka jylla Mizoram ka la iarap ban iada iaka jingwanrung ki briew na bar jylla. “Lada ki briew ki kwah ban wan rung hapoh ka jylla Mizoram, ki dei ban don ia ka ILP bad khlem ka ILP kim lah ban rung, u la ong.
“Kino kino ki briew nabar kiba wan kai ne wan khaii ki dei ban don ia ka ILP”, la ong u Vice President ryngkat ka jingdonlang u President u R. Lal Ramluahpuia.
Ha kawei ka liang ruh ki la ong ba ka ILP kam don jingktah ia ka roi ka par ne ia ka kam shang pyrthei, hynrei ka long ban iada ia la ka jong ka jaidbynriew rit paid.
Ki la pynpaw ba watla ka jingdawa ban pyntreikam ia ka ILP ka la kham slem ha kane ka jylla hynrei watla katta kan shong ha ka sorkar da ka mon ban pyntreikam ia ka ILP.
Lah ban kdew ba ki 10 seng ha kane ka jylla ki la pynlong ka jingiakhih bapher bapher ban dawa na ka sorkar ba ka dei ban pyntreikam ia ka ILP. Hadien ba ka sorkar MUA-2 ba ialam da ka seng Congress ka la kyntait ban pyntreikam ia ka ILP, ki sengbhalang ki la shim ia ka lynti ka jingiakhih ban pynbor ia ka sorkar. Ia kane ka jingiakhih jong ki sengbhalang la ai jingkyrshan da ki kynhun bapher bapher ha kane ka jylla.
Phi don ban ong eiei?