Donkam ia ka NCC kum ka elective sobjek

Shillong, 13 Naiwieng:
U Additional Director General jong ka National Cadet Corps (NCC) u R K Shamar u la ong ba un sa thoh sha baroh ki sorkar jong ki jylla ka dong shatei mihngi, ba kin pynrung noh ia ka NCC kum ka elective sobjek ha baroh ki skul ki jylla ka thain shatei Lam Mihngi.
U la ong ba ka thong ba ka NCC ka buh mynta ka long ban khring ia ki kynthei ba kin pyniasoh bad ka NCC bad ka bhah kaba la buh kyrpang ka long 33% na ka bynta ki kynthei. La ong ba bun ha kine ki jylla kiba pyniasoh ia lade bad ka NCC ki kham leh bha ki kynthei ban ia ki shynrang.
La ong ba kaba kham kongsan eh ha ka NCC ka long ban don ka jingryntih hapdeng ki kynthei bad shynrang khnang ban wanrah ia ka jingiatylli ha ka Ri bad ban pynshlur ia ki samla ba kin shim ia ki kam iada ri da kaba rung ha ki kam shipai.
U Shamar u la ong ba ka jingbei pisa ka sorkar pdeng na ka bynta ki jylla ka thain shatei lam mih ngi jong ka Ri India bad ka Jammu bad Kashmir ka long 100 percent katba ia kiwei ki jylla ha ka Ri India ka jingiabei pisa ka long ha ka ratio 75:25.
Ha kawei ka liang u la ong ba ka long kaba sngewsih ban u iohi ba ki jylla ha kane ka thain kim shym la pynshlur ia ki samla kumba leh kiwei ki jylla ba shatei jong ka Ri India da kaba buh bha kyrpang na ka bynta ki dkhot ka NCC sha ki kyrdan pule kiba kham shalor khamtam eh ha ka Engineering bad Medical.