Shillong:Ka Myntri sorkar Jylla ka Kong M Ampareen Lyngdoh ka la ai jingmut ia ka tnad pule puthi ka Sorkar Jylla ba kan shim khia ban pynmih da ki kynja jingbthah sha ki kmie ki kpa kiba kwah ban phah ia ki khun ba kin leit pule shabar ka jylla.
Kane ka jingai jingmut ka Myntri ka wan hadien ba ka don ka jingkhlad ki ar ngut ki heprit ki la duh ei ia la ka jingim bad 22 kiwei pat ki la ngat ha ka jingshitom kaba jur hadien ba ki la kem pang na ka jingbam ia ka jingbam ba long bih ha Karnataka.
Haba kren sha ki lad pathai khubor ka Kong Ampareen ka la ong ba “Ka dei ka mat ka ba sngewkhia bha, ka Sorkar kam tip ba kum kine ki case ki don katno tylli ha ki por ba la dep hynrei ngi tip ia kawei, ba ka donkam ka jingpynshai sha ki kmie ki kpa ki ba don jingthmu ban phah ia la ki khun sha ki jaka pule ki ba Kim da tip shai”.
“Ngi hap ai ka jinghikai ia la ka imlang sahlang, ban pynthikna ba lada ki phah ia la ki khun sha kano kano ka jaka pule ki dei ban tip shwa la kane ka jaka pule ka dei kaba shngain ne em na ka bynta ki khun Jong ki” ka la bynrap.
Ka Kong Ampareen ka la ong ba ki kmie ki kpa ki dei ban tip halor ki jaka pule halor ki nongpyniaid ia kum kine ki skul, bun sien hi ka sorkar kam don jingtip eiei halor kine ki jaka pule bad kane ka jingpynrung skul ia kine ki khynnah kaba la leh ha kano ka rukom kam don jingtip eiei, kane ka dei ka jinghikai.
“Nga ngeit ban tehlakam ia kum kine ki jingjia ka tnad pule puthi ka Jylla kan sa pynmih la ka jong ka jingbthah ban khang ia kum kine ki jingjia bad kane ka jingjia ba sngewsih kan long ka jingjia ban ai jinghikai bad kan ym dei shuh ban jia ha ka Jylla Jong ngi” ka la ong.
“Ngi dei ban husiar bha shaei ngin phah ia ki khun, ha kum kano ka jaka pule ki mut phah, ha ki por ba la dep ruh ka ju don ka jingjia ba ki ba bun ki samla ki la pass ia ki jingpule Jong ki na ki jaka pule bym pat ioh jingithuh” ka la bynrap.
“Ka dei ia ngi ba ngin ioh ia ka jingshisha bad ngi dei ban phah husiar ia ki nongshong shnong jongngi bad ka long kaba sngewsih ba ar ngut ki jingim ba kordor ki la duh ei, hynrei ka dei ban shim ka jinghikai na kane ka jingjia bad nga ngeit ba ka tnad pule puthi kan sa pynmih da ki jingaijingmut sha ki kmie ki kpa halor ka jingphah pule ia ki khun shabar ka Jylla”.
Phi don ban ong eiei?