“DONKAM BAN SHAH HIKAI”

Dr. B.R. Marpna

Ka jingshah hikai ka long kaba donkam eh haduh katta katta ia ki briew namar khlem ka jingshah hikai ngin nym lah ban poi sha ka thong ha ka jingim jong ngi ki briew. Haba iakren halor kane ka mat, ki don shibun bad kan jrong ruh ban batai ia ki jinghikai (training) bapher bapher la ha ka jong ka jong ka lain. Kum ban shu ai nuksa, u khynnah skul, u shipai, u ba trei ha ki company bad shibun kiwei pat ki nuksa ha kaba ym lah ban jer kyrteng lut hangne ba ki briew ki donkam ia ki jingshah hikai.

Kaei kaei baroh ka sdang na iing (charity begins at home). Ngi shait iohsngew bha ia kine ki kyntien ba lada ngim lah ban sdang shuwa na iing, kaba eh than ban sdang shabar. Ki khun kiba kohnguh ki sdang shuwa na iing da kaba pyni ia ka jingkohnguh na ki kmie ki kpa jong ki. Kine ki jingshah kikai na iing ki long kum ki training ban pynwandur ia ngi ha ka longbriew manbriew ne khamtam eh ha ka jinglong ba kynja mynsiem.

Haba ngi phai na ka Bible, U Jisu U hikai bha ia la ki synran ban trei ia ka kam jong U Blei bad khamtam ban jop ia ki mynsiem sha ka jingpynim. U ju don ryngkat hajan hajan ban ai jinghikai (training) ia ki bad hashuwa ba Un kiew noh sha bneng, nyngkong U phah ban sdang ialap na Jerusalem bad kumta ter ter. Ka Jerusalem ka dei ka iing jong nga bad jong phi kum ki khun Khristan ban sdang ia kiei kiei na iing (kumba la batai haneng).

Haba ngi shah hikai, ngi donkam bha ban sngap ia kiba hikai ia ngi namar ki long kiba la sngewthuh bad kiba la iaid lyngba ruh. Kum ka jinglong Khristan ngi don ha ka madan thma kaba kynja mynsiem (Spiritual Warfare) pyrshah ia ki bor jong ka jingdum bad ki bor jong u soitan. Ka thma ka ialeh ia ngi man la ka sngi, khlem shongthait ban pyntlot ia ngi. Haba ngi phai na ka Bible, ngi ainguh ia U Blei ba u David kum u Syiem ha kito kito por u la jop ia ki thma pyrshah ia ki nongshun jong u. U dei U Blei Uba la iarap bad hikai ia u ban ialeh thma. U don ki atiar bad ki kynhun shipai kiba khlain hynrei u shaniah ha ka jinghikai jong U Blei ban ialeh thma.

Lok baieid ha U Trai Jisu, ngi ruh ngi donkam ba U Blei Un hikai ia ngi ban ialehthma bad ban ym shaniah ha la ka jingstad ne jingkhlain lajong. To ngin phai sha U uba lah ban hikai kumba U Jisu U ong ia la ki synran ha ka Gospel katkum u Mathaios 11:29 (to hikai ruh na nga…). U David ha ka Salm kaba 144:1, u ong kumne “Long ba la kyrkhu ia U Trai u mawsiang jong nga, uba hikai ia ki kti jong nga ia ka thma, bad ia ki shynriahti jong nga ban ialeh”. Ai ba U Blei Un ai ka jingstad bad ka jingshemphang ban ialeh ia ki thma kiba ngi ia kynduh ha la ka jong ka jong ka jingshem jong ngi.

U Blei Un Kyrkhu, Amen