Shillong, 15 Naiwieng:
U chairman ka National Skill Development Agency (NSDA) u S Ramadorai u la ong ba la donkam ban pynthymmai ia baroh ki jaka ai jinghikai Industrial Training Institutes (ITIs) katkum ka jingiaid ka juk khnang ba kan long ka lynti ia ki samla.
“Ngi la tip ba don bun bah ki ITI kiba treikam kiba la rim bha ha kaba ki jait jinghikai kim iahap shuh katkum kane ka juk. Donkam ban wad ia ki lad ki lynti ban pynthymmai ia kine ki ITI lyngba ka Public Private Partnership (PPP)”, la ong u Ramadorai haba kren hadien ka jingialang bad u Myntri Rangbah u Mukul Sangma bad ki myntri hynne ka sngi ha Shillong.
U la ong ba donkam ban ai ia ka jinghikai kaba biang bad kaba janai ia ki samla khnang ba kin lah ban ieng ha la kajong ka kjat katkum ka jingiaid ka por.
U chairman ka NDSA u la ong ba ka NDSA kan ai ia ka jingiarap ia ka sorkar Meghalaya ba kan pyntreikam ia ki jingai jinghikai ia ki samla ha kane ka jylla kiba iakynduh ia ka jingeh namar ka jingbym ioh kam bym ioh jam.
“Kaei kaba kham donkam ka long ba donkam ban ai ia ka jinghikai kaba larkam ha ki jait kam bapher bapher sha ki samla. Kane kan iarap ban weng ia ka jingbym ioh kam bym ioh jam jong ki samla”, la ong u chairman ka NSDA.
U la iathuh ba kin don haduh san klur ngut ki samla ban ioh jingmyntoi na ka 12th Five Year Plan.
U Ramadoria u la ban ba ka long kaba donkam ban pyntreikam ia ki prokram bapher bapher hapoh ka por kaba la buh thong.
U la ong ba ka jingkyrshan pisa kan long na kiba bun ki lad ki lynti. Ka lynti ka long lyngba ka PPP bad da kiwei ki lad ba la kyrshan pisa na ka Asian Development Bank (ADB).
Ha kajuh ka por u Myntri Rangbah u la ong ba ka sorkar ka la thaw lad ban pynbha ia ki lad ban thaw kam ia ki samla ha kane ka jylla bad shabar ruh.
Ki jait jinghikai kiba kham pynleit jingmut kin long kum ha ka rep ka riang, ka rep soh rep syntiew, ri jingri, shna maw, ka bam ka dih, ka thain jain bad kiwei.
U la ong ba la pynkhreh ia ki ITI ha Shillong bad ha Tura ban leh lyngba ka PPP mode.
Phi don ban ong eiei?