Don tang shi percent, kiba ioh um da ka kor um ha la iing ha Meghalaya

New Delhi: Ka kaiphod jong ka Jal Shakti ministry, ka pyni ba ka West Bengal, Meghalaya bad ka Bihar, ki dei ki lai tylli ki Jylla, ha kaba ka jingtan um dih sha ki longiing, ka long tang shi percent.

Katei ka dei ka kaiphod, kaba la phah sha ki myntri peit um jong ka sorkar Jylla, ha kaba la pyni ba kitei ki jylla, ki ioh um dih lyngba ka jingtan um na ki nar kor, ka long tang shi percent sha ki iing briew. Hadien jong kata, ki don khyndai tylli ki Jylla, kiba ka jingsam um sha ki iing briew, ka long tang 5 percent bad nangta sa ki 13 tylli ki Jylla, ka long 10 percent bad ha katei ka kaiphod, la pyni ia ki hynniew tylli ki Jylla, ha kaba ka jingsam um dih sha ki long iing, ka long palat ia ka 50 percent.

Mynta katei ka tnat, ka don ia ka jingthmu, na ka bynta ban pyn treikam ia ka skhim kaba la kular da ka sorkar BJP bad kata ka long “Nal se Jal” lane ka um na ka umkor, na bynta kawei pa kawei ka longiing, ha kaba yn pyntrei kam ha ki san snem ban sa wan.