Don tang 1.8% kiba khlem kam khlem jam, ha u snem 2020-21

Shillong:Ka jingkiew ka jingdon kiba khlem kam khlem jam (Employment Rate) ha ka jylla ha u snem 2020-21 ka long 1.8% katba kiba ïohkam ne Employment Rate ka long 98.2%, katba ha u 2019-20 bad 2018-19 kiba khlem kam khlem jam ki don mar 2.8% katba kiba donkam ne kiba la treikam ha kitei ki juh ki snem ka long mar 97.2%.

Katei ka tyllong khubor, ka dei ka jingkheiñ kaba la ïoh na ka tnat sorkar jylla kaba peit halor ki kam bylla ne Labour department.
Katei ka jing kheiñ, ka dei ka jingtip ba bniah hapoh ka jylla ne state level kat ba kaba ïadei pat ka district wise ym shym la ïoh jingkheiñ satia.
Ka tyllong khubor ba la ïoh na ka tnat, ka ïathuh ba kam shym la don ka jingkiew ïa ka jingdon kiba khlem kam khlem jam ha ka jylla watla ka la don ka jinghiar ne suki ka ïoh ka kot ha ka Ri India baroh kawei.

Ha kaba ïadei pat bad ka jingdon ki shynrang bad kynthei kiba la lah ban treikam ha sor bad nongkyndong kiba mynta la kynthup hapoh ka kyrdan kiba khlem treikam ne unemployed la ong ba katkum ka PLFS 2020-21 ha nongkyndong ki shynrang ki don 4570 bad ha sor ki don 6192, katba ki kynthei ha nongkyndong ki don 2668 bad ha sor ki don 7532 kumta baroh haba kheiñ kyllum lang ki la poi sha ka 20,962 ngut.
La ong ba wat hapdeng katei ka jingkiew kiba ïohkam ïohjam na ka liang ka tnat ka la shim ki sienjam ban pynim ïa ka jingthaw ki lad ïohkam ïohjam bad ka aikam ïa ki samla.

Katto katne ki kam ba la sdang ki long ka prokram Promotion and Incubation of Market -Driven Enterprises (PRIME), ka Mission Mode Programme hapoh ka Agri & Allied Sector, ka Farmers Collectivization for Upscalling of Production and Marketing System (FOCUS) ka jingkyllum lang ïa ka Meghalaya Home Stay Scheme bad ka Prime Minister’s Employment Generation Programme (PMEGP) ka jingkyntiew ïa ki Kynhun rap lade ne SHG.

Ka Skills Acquisition and Knowledge Awareness for Livelihood Promotion (SANKALP) hapoh ka Ministry of Skill Development and Entrepreneurship, ka jingsdang ban buh ïa ki Information Technology Park.
Kiwei pat ki prokram sengkam lajong jong ki tnat bapher bapher kum ka ASPIRE, YESS, Grassroots Music Project bad kiwei, nangta ka Meghalaya Agriculture Response Vehicle Scheme, ka Meghalaya Luxury Tourism Vehicle Scheme bad kiwei ki kam.