Don pakhang shnong HNLC shibit janmiet? Wat pep trei maham ka sorkar

Shillong, 9 Jylliew:
Halor ka jingkhot pakhang shnong jong ka HNLC, kaba sdang naduh ka por 6baje janmiet jongka 10tarik mynta u bnai bad kaba bteng haduh ka por 6baje janmiet jong ka 11tarik, kumta la pyn beit ia ka jingialang mynta ka sngi, na ka bynta ban teh lakam ia ka shongsuk shongsain, ha kaba la don lang ki nongtrei jong ki ophis sorkar India, ki skul, ki Bank, ki pulit bad ki Deputy Commissioner, U Director General of Police bad sa kiwei de ki ophisar heh.
U bah PBO Warjri, Additional Chief Secre tery, u iathuh ba ka sorkar ka shim khia bha halor ka jinglong ka suk ka sain bad kumta u bthah ia kitei ki khlieh jong ki tnat sorkar bapher, ba kin bthah ia la ki jong ki nongtrei, ba kin poi sha la ki jong ki kam jongki. Ula kren iaroh ruh, ba ki ophis sorkar bad ki Bank, ki plie, ha kaba kum katei ka jingkhot pakhang shnong, kaba la dep pynlong da katei ka seng, ha ki khyndiat taiew mynshwa.
U Director General of Police,u pynsngew ba ka la don ka jingpynbeit ban ai jingiada kaba biang ia baroh bad ula iathuh ba ki ladon ki jaka, kiba la pynbeit, na ka bynta ban kham pynkhlain ia ki kam ai jingiada bad ki jingpahara jong ki bor pulit. U ong ruh ba ka pakhang shnong, ka dei kaba la khot da ka seng, kaba beain bad kumta, kito kiba kyrshan, kin ngat ha ki kyndon ain, ba ki ia treilang bad ka seng, kaba long beain. Na ka liang ki bor District, ki iathuh ba ki la iakren bad kiba don bynta ha ki kam pyniaid skul, ha ki kam pyniaid bos, pyniaid taksi bad kiwei, ba ka leit ka wan, kan iaid beit iaid ryntih. La ai ruh ia u telephone number 2222277, ban phone lada don kano kano ka jingdonkam. Laong ruh ba ki nongtrei sorkar, kiba pep, khlem jingbit, kin ngat ha ki ain ba la buh da ka sorkar, halor katei ka jingleh jongki, ong ka kyrwoh na
U Joint Secretary to the Government of Meghalaya, Political Department.
Na ka liang ka HNLC, ha ka 1tarik mynta u bnai, ha ka kyrwoh khubor jongka, ka la pynsngew ba ka National Green Tribunal (NGT), haba ka shong bishar ha ka 9tarik mynta u bnai, lada jia ba kam ai kam ia kito kiba duh kam, kumta ka seng, kan khot da ka pakhang shnong, kaba 24 kynta, kaba sdang, naduh ka por 6baje janmiet jong ka 10tarik bad ka ban kut haduh ka 6baje janmiet jong ka 11tarik mynta u bnai.
Hynrei, mynta ka sngi, ka HNLC, ka khlem ai jingtip eiei sha ki kotkhubor, la kan iaid beit ne em, katei ka pakhang shnong, kaba la dep pynbna la phra sngi mynshwa.