Don kiba iohi dur Jisu, ha u sohsaw ha Madanryting

Shillong, 21 Nailur:
La san sngi naduh ba thied ia u Sohsaw uba don ia ka dur diengphna um pat lei lei haduh mynta ruh; hynrei u nang kham shai phyrnai pynban narud narud bad ka jingshai ka diengphna ruh ka nang iai thaba pynban. Bun kiba leit peit ia utei u sohsaw naduh mynhynnin ka sngi haduh mynta ka sngi ruh, ha kaba ki trai ing ki la iathuh ba mynta ka sngi ruh ma kim pat ia khie thiah hynrei kiba kwah peit ia utei u sohsaw ki la nang ia ieng lain shabar ing.
Ki la iathuh ba napdeng kiba wan peit, don ruh kiba iohi ha la ki jong ki jong ki jingiohi phylla, ia kaba kiwei pat kim lah ban iohi kumba iohi ma ki; namar ba ka paw tang ha ki hi. Don kiba iohi ia ka dur Jisu ha i bynta ba don ka Diengphna bad don ruh kiba iohi wur wur wer wer kum ka dur briew hynrei kim lah ban ithuh bad ki iohi shai tang ia ka kti ka mon.
Ki la don bun kiba wan peit ia utei u sohsaw don dak phylla ha ingsah jong ka kong Balahun Kharkongor kaba don ha Pdeng shnong , Madanrting ha kaba la iathuh ba ki don kiba la wan naduh Amlarem ruh bad don ruh ki khar Bihari kiba la wan peit khnang.