Don kiba dang tur sha ka Sorkar Bamsap

B.M.Lanong

Ki rangbah Ka Sorkar India ki la kdew khlem riej, ba kane ka Sorkar NPP ka long ka Sorkar kaba ‘‘bamsap tam ha Ri India baroh kawei’’. La mih ha ki kot khubor baroh. Ki don ki jingshisha halor kane ka jingkynnoh, namar ki rangbah NPP ki leh kum bym iohi ne iohsngew, ki sngap man-man. Haba sngap te ka mut, ki kubur em ia ka jingshah kynnoh?

Hynrei hapdeng kat kane ka jingshah thad, dang don pat kiba dang leit NPP tangba ki bun da kito kiba ju mlien hi ban shang makia, ban tah mluh kat haba don, kiba man ka 5 snem ki kylla rong bad kylla jutang. Kito pat kiba kyrshan ruh, ki dei na kajuh hi ka tyllong bad ka nongrim plastik; shu kyrmen ba kin ia kad lang.
Khang Ia ka MCCL Sohra ruh
Ha ka por ba long Chairman u Wailad Shylla, MLA Ka Jowai na ka seng NPP hi, la khang noh ia ka karkhana MCCL pynmih dewbilat babha ha Sohra ha u snem 2020, kaba ieng halor u mawshun bad u dewiong ka ri Sohra. Lada ki Karkhana shimet ki kaia ha Ri-Bhoi bad Jaintia Hills ki lah ban pynmih dewbilat, balei ka karkhana Sorkar, kaba don naduh ki snem 1955 ka la jah noh. Khein kein ia ki jingiasam bhah! Hato u Minister Delhi un shu kynnoh kulmar tang ban lait syngaw?
Kumno ka Sorkar kan pyniaid kat ia ka jylla, haba tang ia ka karkhana ba dang iaid kam la khang noh? Une u dei na kajuh ka Dhar Company.

Ym nud weng ia ki spong Iewmulong
Lada la weng shimiet-shimiet ia ki dukan ha Polo, haba leit tynrah da ki JCB dang 3-4 baje mynstep, kumno ia ki spong ha Iewmulong ym nud weng na ka jaka Sorkar, nalor ba don bun ki ain bad ka Meghalaya Public Premises Eviction of Unauthorized Occupants Act 1980?
Ha kato ha Polo, uba mareh khlem patlun ruh uto, uba poi lymbuit sha um ruh uto, ba wan tynrah ki JCB ia ki dukan dang dum, balei ym leh kumjuh ha Iewmulong, khnang ban pynheh ia ka jaka ieng ki kali bad ban khuid-suba bad kylluid ka Iewduh-iew niam?
Ki paidbah ki par kum ki dkhiew ha sor Shillong, ki tur beit sha ki kali kiba iaid, naduh ki kynthei ki khynnah; tang kawei ka surok suin (fly-over) ruh ym don. Katba ha sor Guwahati, da ki phew tylli la mih ki fly-over. Shano ki nongsynshar?
Ka Sorkar khaw Pyrsit
Iadon lut jan baroh ki seng ha kane ka Sorkar, kynthup ia ka BJP kaba kdew kti ia ka Sorkar. Kan da wan lei kane te, tip kaei kaban jia, namar haba pan ki Seng Bhalang ia ka ILP, ka BJP ka ong pynban ban ai da ka Rel, kaban pynjot ia ki khlaw, ki lum ki wah bad kaban wan kit lut ia u jait pa u jait.
Mano kein ban kren ia kitei ki jingeh, ki jingma, haba ki bun ki Minister kiba trei bisines, kontrak ter-ter ki bym bna ia ka bneng ka khyndew. Don lei uwei uba na West, uba da u ophisar ruh um leit, haba khot ma u.
Ki nongmihkhmat ‘Methrik fell’ (bym pat lait matric), kiba shu kren ‘phareng- khaii’ (trading English) lulu-lele, kumno kein kin pyniaid kat ia ki kam ka jylla kiba kynthup ym tang ia ki kam Ain-kanun suda, hynrei ia ka mang tyngka (budget), planning etc. kiba dei ia ki kam pynroi ba bun jait bad baroh kiwei ki jait kam, ia kiba dei ban peit tang da ki khraw jabieng? Mano ba jied kum ia kine ki jait MLA, MDC? Haba mih kum kine ki nongmihkhmat, ka phalang sha ki nongjied kiba phah ia ki.

Hynrei to iapeit bha ruh ia ka jingbha bad jinglong jong ki nongialam, “namar lada leh stad u bieit, teng-teng dang shi rukom, hynrei lada ak bieit hi u stad te, da ia husiar bha”.
Ia ki mahajon lei, kham husiar shuh-shuh, namar kine ki khaii na ka Sorkar syndon bad ka ktah ia ka bynta u paidbah.
Peit kumno kynthoh ki nongpeit pyrman-
I Rev. Dr. Edwin H. Kharkongor Secterary KJCLF bad Bah River 0. Wallang., Member KJCLF, kila kynthoh kumne harum ha u Nongsain Hima dt. 30.12. 2022-
“Kawei kaba kiba bun na ki paidbah ki ju liat ka long ka jingai buhrieh da ka pisa ban thied ia ka vote jong nga bad jong phi. Baroh ngi sngewthuh ia ka dor jong ka pisa. Uba duk ne uba riewspah ruh un shem shitom ban kyrngah haba don ba ai pisa ei. Kane ka rukom thied ia ki paidbah ban kyrshan ia uno-uno u kyrtong ka la byrsieh haduh katta-katta ha kane ka Jylla jong ngi. Ha ka pisa, imat u nongai bad u nongpdiang ruh um don jingsang, ym don niam, ym don jingiatiplem shuh. Ngi la iohsngew ia ki khubor ba pyndiaw shisha ba don ki kyrtong ki bym buhrieh shuh ia kane, hynrei ki kop pynban ia kine ki jingleh bymhok jong ki.
Nalor ka pisa, mynta ngi iohi ba ki kyrtong ki pyndonkam sa da kawei ka buit: kata, ban ai da ki jingaisngewbha kum ki jain, ki tiar ki tar, ki nep kup thiah bad kiwei de.
Kum ki Kristan, ngi dei ban tip ba kane ka jingai bad jingpdiang ia ka pisa ban thied bad ban die ia ka vote jong ngi ka long ym tang kaba be-ain, hynrei ka long kaba ki jinghikai bad jingngeit Khristan ki mana pyrshah. ”