Don kiba bishni ba kynnoh die jaka: Witting

Shillong, 22 Lber:
U MLA ka Maw-shynrut u Bah Witting Mawsor u la kyntait ia ka jingkam ka sorkar ba u la tyrwa die jaka sha ki shipai BSF ha Umjarain, Nongstoin kumba la kren da u myntri kam pohiing u Bah HDR Lyngdoh ha iing dorbar hynnin ka sngi.
Haba pynshai halor kane ka jingkren jong u Bah HDR Lyngdoh, u Bah Witting u la ong, “Da ka mynsiem sngewkhia, nga kwah ban pynshai ia phi ki paidbah nongpule kot khubor, baroh ba ka jingmih khubor, ha ka kot khubor ka dei kaba lamler bad ka bym don nongrim haei haei”.
U la bynrap, “Nga khlem leit ia kynduh ia u DC Nongstoin ryngkat bad kita ki 10 ngut ki trai khyndew mynno mynno ruh, kane ka long tang ka kam bishni shimet ia nga bad ka jingthmu ban pynjah burom ia nga da mano re mano, u myntri u la ioh jingtip bakla na u D.C .Nongstoin”.
Hynnin ka sngi ha ka jubab jongu, u bah HDR Lyngdoh u la ong ba ki don 10 ngut ki trai khyndew kiba na ka Shnong Pyndengrei ryngkat u bah Witting Mawsor, MLA, Mawshynrut ki la leit ia kynduh ia u D.C Nongstoin ban tyrwa jaka ia ki BSF ban ktem ha Umjarain, Nongstoin. Ia kane ka jubab jong u Bah HDR Lyngdoh ka long hadien ba u MLA ka Nongstoin u bah D Jyndiang u la wanrah ia kane ka mat ha iing dorbar thawain.