Shillong:U Syiem ka Hima Mylliem u Paiem Ainam Manik Syiem ha ryngkatlang bad ki Myntri ka Hima ki la ïathuh ba naduh ba ka Hima ka la pynmih ïa ka hukum haba ïadei bad ka kam ot kilo ha u 2019 ka Hima kam ju ïoh shuh ki jingujor halor kane ka kam ot kilo.
“Kane ka jingot kilo kadei sha kiwei ki thaiñ kum sha thaiñ Ri Bhoi, hynrei ha Ïewduh naduh 2019 kam don shuh ka jingot kilo bad khlem ïoh jingujor, bad ka Hima ruh ka khlem shong kli kti haba ïadei bad kane ka bynta,” ong u Paiem Ainam.
U la ïathuh ruh ba ka la don ka jingïapynbeit ba ki nongrep kidei pyllait shwa ïa ka mar la ka jong ban thew nangta ïa ki kriah bad Polo ban thew kilo bad naduh 2019 ka Hima ka la pynmih ïa kane ka hukum, ka jingot kilo ka dei ka jingïasngewthuh jingmut lang jong ki nongkhaïi bad nongthied.
U la ong ruh ba watla ka Hima Mylliem kam shym la ïoh shuh ki jingujor hynrei ka jingwan ka Myntri sorkar ba khmih ïa ka Tnat ki kam Rep, dei ka jingujor ka Hills Farmers Union (HFU) bad katto katne ki nongrep.
Haba ban biang ba naduh u snem 2019 ym ju ïoh jingujor shuh halor ka ot kilo na ka liang u Paiem Ainam Manik Syiem u la ong, “Nga kyrmen ba kane ka dorkhas ne memorandum kaba ka Dorbar u Syiem Hima Mylliem ka la aiti mynta ka Sngi sha i Myntri ka Tnat Rep haba ïadei bad ka jingdonkam ban buh ïa ka Cold storage hajrong jong ka building ka ïew iadie ïathied hapoh Ïew Dielang ka Sorkar kan shim khia namar lah bun ki jingthoh pan jingïarap sha ka Sorkar ki shu sah tang ha ki jingthoh.”
Haba ïadei bad ka jingeh ki nongrep nongkhaïi bad ka jingduna ka marrep ne ki jhur hapoh Ïewduh na ka liang u Paiem u la ong, “Ngi ïohsngew ba ki don ki middle man ne ki nongkhaïi pdeng kiba la bat lypa ïa ki mar rep hapdeng surok, kumta u mar sha Ïewduh u khlem lah shuh ban poi 100% sha Ïewduh ba sa mad jingeh ki nongkhaïi, ki nongrep bad nongdie.”
Phi don ban ong eiei?