![](https://www.urupang.com/wp-content/uploads/2024/07/image-80.png)
Shillong:Mynhynnin ka sngi ka 23 tarik Naitung 2024, u MLA ka Nongkrem u bah Ardent Miller Basaiawmoit u la pyllait paidbah ia ka MLA skhim kaba T. 2.50 klur sha ki paidbah ka konstitwensi.
La pyllait ia kane ka skhim hapdeng ka jingdon lang ki paidbah ha phyllaw ka iing sah jongu ha Lad Nongkrem.
Haba pynbna ia kane ka jingmang pisa na ka MLA skhim 2023-24, u bah Ardent ula pynbna ia ki kyrteng kiba ioh bad kumjuh ka jingmang kaba u la sam ha ki nongioh bynta.
U la mang 60 tylli ki iing baduk ha ka dor 75 hajar kawei kaban kot baroh sha ka 45 lak tyngka, ka jingmaramot ia ki iing ne ban pynkha kamram sha ki 200 ngut ha ka dor 25 hajar tyngka kawei ka long 50 lak tyngka, ka jingiarap ia ki nongrep, kiba shong dukan sha ki 500 ngut mar 10 hajar tyngka kan long 50 lak tyngka, ka jingshna kamra klas ia ka Presbyterian skul, Pomlakrai 20 lak tyngka, ka skul ha Lumkynshai 12.50 lak tyngka, skul ha Nongkrem 15 lak tyngka, skul ha Laitkor 10 lak tyngka, iing skul HL Mizo Madanriting 10 lak tyngka, Unitarian skul Nongkrem 2.5 lak tyngka, ka gallery ha Laitkor 15 lak tyngka, jingshna pynheh madan ha Mawpynthaw 15 lak tyngka, iing skul Reach Shillong Ministry 5 lak tyngka, bad baroh ka long 2.50 klur tyngka.
La ai ruh ia ka Sports club Madanrting 50 hajar tyngka, Pomlakrai 50 hajar tyngka, Smit 50 hajar tyngka, Umphrup 50 hajar tyngka bad ka Nongkrem sports Club 50 hajar tyngka. U bah Ardent u la ther ia ki MLA kiba iathuh khana sarong ia ka Discretionary Grant (DG) kaba T. 10 lak ba ki ai bai dawai sha ki paidbah.
Haba kren ha ka jingpyllait paidbah ia ka MLA skhim jong u jong ka snem 2023-24 mynta ka sngi, ha Lad Nongkrem u bah Ardent u la ong ba don ki MLA ha kine ki sngi kiba iathuh khana sarong kumba ki theh lut sha ki paidbah ia kata ka 10 lak tyngka hynrei, balei kim pynshai ia ka 250 lak ne ka 2.5 klur tyngka. U la ong ba hato ka 10 lak ha ka shi snem ka long mo ban iathuh khana ban ai bai dawai ia u paidbah namar ba ka long kumba thad rong ia u paidbah. u la ong ba um ju bam ei wat tang shi tyngka ruh na kata ka DG bad u ai beit sha ka bank account jongki, lait noh tang kiba shem jingeh kyrkieh.
U la ong ba ka iing u MLA kam dei ka jaka ban pynieng lain ban ai bai dawai hynrei ka donkam ban pynbiang ia ki lad sumar kiba biang. Lada ai 5000 uwei, tang 200 ngut la lut ka 10 lak tyngka bad u la ong ba ym donkam ban pynbna paidbah ia ka 10 lak tyngka, hynrei la ai ia kiba dei ban ai.
U la ong ba hato ka don jingmut ban ai bai dawai 500-1000 haba ka bai sumar ka poi da ki phew hajar bad wat da ki lak.
U la ong ba ka 10 lak tyngka ka pynduh thiah ia ki MLA ka VPP namar ba kam lah ban pyndap bai dawai ia ki paidbah bad kam pat biang ban iathuh khana sarong ia ki paidbah.
Katkum ka kyndon ka sorkar, la shah ban iarap tang 15 hajar marwei hynrei ka bill kiba shah sumar ka poi ka bill sha ka 1 lak, hato long ban ai tang 15 hajar.
Ki don kiba wad daw ia ka VPP namar ba ki la syier namar ba ka VPP kan synshar ha district council bad ha u 2028. U la ong ba ym shah ia ki MLA ka VPP ban treikam kontrak hynrei don ki khep ba ym lah ban kyntait bad hap sei da ka tulop ban iarap.
Phi don ban ong eiei?