Don ki MLA ka Congress ba byrthen ban phet noh

Shillong, 02 Jylliew:
Ka jingiakhih pynkhyllem ia u Mukul Sangma kum u nongialam ka Congress ka la lah ban kham jur hadien ba don katto katne ki MLA kiba la ap kmong ia ka por ban risain noh na kane ka party ban leit iasoh bad ka BJP hynrei don pat ki myntri sorkar kiba thmu ban risain noh ha kine ki sngi.
Katkum ka khubor ba la ioh lum,  la iathuh ba ki don ki myntri sorkar jylla kiba la thmu ban risain noh na ka kam myntri ha kine ki sngi ban wan kum ka jingpyrshah ia ka jinglong nongialam jong u Mukul Sangma.
Ka jingthmu jongki, ban risain ka long hadien ba ki sngewthuh ba ka jingiakhih kan nym poi shaei shaei lada kin dang iakhih da kaba snoh pat rdin ha ka shuki myntri.
Kham mynshwa, u nongialam liangpyrshah u Dr Donkupar Roy haba kren sha ki nongthoh khubor u la ong ba ki myntri sorkar ka Congress kim lah ban iakhih pyrshah ia u Myntri Rangbah haba ki dang snoh rdin ia ka shuki myntri, namar ba ia ki la thung myntri da  u Lat da ka jingbthah jong u Myntri Rangbah.
“Ki dei ban risain shwa na ka kam myntri lada kim shaniah shuh ia u Myntri Rangbah bad sa iakhih ban pynkylla nongialam”, la ong u Dr Don.
Katkum ka khubor, la iathuh ba ka jing iasyllok hapdeng ki katto katne ngut ki myntri ka dang iaid ban risain noh na ka kam khnang ban pynjur ia ka jingiakhih pyrshah ia u Mukul Sangma.
Kine ki myntri ki dei na Khasi bad Jaintia Hills bad wat na Garo Hills ruh tangba ia ki kyrteng, ym pat pynpaw thikna. Kumba long mynta, ki myntri ba iakhih pyrshah ia ka jinglong nongialam jong u Mukul Sangma, ki kynthup ia ka Deborah Marak, AL Hek, Prestone Tynsong, Sniawbhalang Dhar bad kiwei.
La ioh jingtip ba ki don ki MLA kiba la ap siar ban poi ka por ba kin phet noh na ka Congress ban leit pyniasoh bad ka BJP kynthup na West Khasi Hills, na Jaintia Hills, bad ruh na Khasi Hills.