Don ki Khasi kiba leit thied jhur na Jagiroad ban pynpoi sha Sonidan

Nongpoh: Ka jingdon jong ki katto katne ngut ki Khasi, kiba la leit ban thied jhur na ki thain Jagiroad Assam, da ka jingthmu ban die sha ki briew ha ki shnong bapher bapher kiba don ha ka thain Sonidan Mawhati, ka la wanrah jingma ia ki paidbah kiba sah ha ki shnong kiba don ha katei ka thain hi baroh kawei.

Ia katei ka jingdon jong ki katto katne ngut ki Khasi kiba la leh ia katei ka kam, la iathuh da ki dkhot ka HANM, Sonidan, ha kaba ki la ong ba ki dang don kiba kum kitei ki riew shimkabu kiba la nud ban leh ia katei ka kam, kaba la wanrah ia ka jingtieng jingsyier pat ia ki paidbah kiba sah ha katei ka thain.

Haba pyntip sha ki nongthohkhubor, u Bah Pateng Marsing, President ka HANM ha Ri Bhoi, u la ong ba ki dkhot ka seng ki la ioh jingtip bad lap ba ki don shisha kiba kum kitei ki briew kiba dei ki Khasi, ha kaba ki la leit ban thied jhur na ki shnong kiba don ha ki thain Jagiraod bad kiba thmu pat ban die sha ki shnong kiba don ha ka thain Sonidan.

Haba iadei bad ka jingdon jong kiba kum kitei ki briew, na ka liang ka HANM, Ri Bhoi, ka la kyntu jur ia ki bor Distrik ka Ri Bhoi bad khamtam eh ia ki Pulit kiba don ha Umsiang, ba ki dei ban kem bad ban pynshitom ia kiba kum kitei ki briew, namar ki leh ia katei ka kam khlem da ioh jingbit.
Ka seng ka kyntu ruh ia ki bor distrik ka Ri Bhoi, ba kim dei ban shah iano iano kiba wan na Assam watla dei ia ki Khasi, ba kin rung da kaba suk shapoh ka jylla, namar lada ki kwah ban rung ki dei ban iaid lyngba ka Byrnihat, ka jaka kaba la don ki briew ka koit ka khiah bad kiba lah ban tohkit ia ka leit ka wan bad ruh ban peit ia ka koit ka khiah ha ka met u ne ka briew.
Ka seng ka kyntu ia ki nongialam shnong bad kumjuh ia ki riew paidbah ba ki dei ban shimkhia lem halor kane, namar lada ym shimkhia lane ban ailad ia ki briew nabar ba kin rung katba mon, ka jingma kaba khraw ka ap ia ka jylla, namar kumba ka long mynta hapoh ka jylla Assam la don kiba la ioh ia utei u khniang jingpang Covid-19 bad katno tam ia katei ka thain kaba iajan eh bad ka Assam.
Khadduh eh na ka liang ka HANM, ka ai ka jingkhublei kaba kyrpang ia ki Bor Distrik ha Ri Bhoi, kiba la shimkhia bad trei met bad mynsiem, na ka bynta ban pyrkhing ia ka jingwanrung ki briew kiba nabar.