Don ki jingbatai bakla ia ki kyndon shna iing ka MUDA: Ampareen

Shillong, 18 Jylliew:
Ka myntri ka tnad sor ka Kong Ampareeen Lyngdoh ka la ong ki don ki jingbatai bakla ia ki kyndon shna iing jong ka  MUDA ha kaba iadei bad ka khrum jong ki jingtei.
Ka jingialang ka kynhun myntri mynta ka sngi ka la pdiang ia ki jingpynkylla ia ka Megha laya Building Bye Laws-2011. “Ki don jingbatai bakla ia ki kyndon kiba iadei bad ka khrum jong ka jingtei, ki jaka pynieng jaka, ki jingjrong jong ki jingtei”, la ong ka Kong Ampareen.  Ka la ong ba ka sorkar ka dang pynkhreh ban bishar ia ki kyndon kiba iadei bad ka jingjrong jong ki jingtei bad donkam ban pynkylla ia ka Meghalaya Building Bye Laws.
Ka kong Ampareen ka la ong ba  ka Meghalaya Building Bye Laws, 2011 ka thmu bad ai ia ka jingbatai kaba shai ia ki khrum jong ki jingtei, ka jingjrong, ki jaka ieng kali. Ka jingtei kaba saw mala ka dei ban long 14 meter khlem khrum bad kaba 5 mala, ka dei ban long 17 meter ryngkat ka khrum.
Lah ban kdew ba ka High Court ka Meghalaya ha ka hukum jongka, ka la bthah ba ia ki jingtei kim dei ban palat ia ka lai malai bad ka khrum (G+3) ha nongbah Shillong.
Ka Kong Ampareen ka la  ong ba ki kyndon jong ka MUDA la pynkylla naduh  12 tarik Lber, 2011 da kaba pynrung ia ki kyndon ban iada, ban ioh license na ki enjiniar shwa ban shna iing, bad ban shna ia ki lynti ban lah ban iaid ki briew ba don jingduna dkot met (Persons with Disabilities (PWDs).
Ka la ong ba ka sorkar jylla ka lah ban pynmih shuh shuh ia ki jingpyrkhing ban shna ia ki iing bun mala katkum ka Meghalaya Town and Country Planning Act.