Don ki Balang kiba kyntait skhim Sorkar, ong U bah Process

Shillong: U MLA ka Mawlai u Process T Sawkmie la kam ba don ki kynhun Balang kiba kyntait ia ki skim sorkar ne ki MLA shkim namar ba ka long kaba sniew bad kam ia dei dur bad ka kam U Blei. U Process T Sawkmie u la kren ia kine ki kyntien ha ka jingialang ba plie paidbah ia ka surok na Lad Umjajew ban leit sha iing mane ba thymmai jong ka Balang Now Generation Outreach Revival Assembly ha Mawlai Nongkwar ha ka jing ia donlang u Pastor rangbah Batkupar Dunai, Pastor Cross Marbaniang, u Rangbah Dong bah Swer bad kiwei ki riew rangbah lem ba ki longmie na ka shnong bad ka Balang.

U bah PT Sawkmie ula pynpaw ka jingsngew diaw halor kane ka jingkyntait ki kynhun Balang ia ki skhim pynroi jong ka sorkar jylla na bynta ki paidhah nongshong shnong.
“Ki don ki kynhun Balang kiba la wan ba kynduh ia nga hynrei ki la kyntait ia ka jingiarap lyngba ka shkim sorkar,” ong u Bah PT Sawkmie bad bynrap lada ka shkim sorkar ka dei kaba sniew, kata ka mut ka tulop ba ki nongtrei sorkar ki ioh ruh ka dei kaba sniew bad kane ka mih tang na ka jingsngewthuh bakla jong ki briew.
Ula ong lada nga tuh, pyniap briew ne lute ka dei hok kein ba kin kyntait ia ki shkim pynroi, hynrei ngam shym long kumta bad kum u nongmihkhmat paidbah ka dei ka kam ram jong nga ban iarap, lah ha ki kynhun Balang, ki shnong, ki dong ne ki riew shimet kiba donkam shisha ia ka jingiarap khlem da niew shilliang khmat iano iano.
“Ka jingkyntait ki kynhun Balang ia ki lad jingiarap ka sorkar, ka dei tang ka jingsngewthuh bakla jong ki nongialam bad kan long ka jingduh nong ia ka Balang ne ka shnong bad ia ki paidbah baroh,” ula bynrap.
U Bah PT Sawkmie u la kam ruh ba ki dang don ki kynhun kiba sngewthuh bakla ba ki skhim pynroi ba la wanrah da sorkar jylla ne ki Nongmihkmat ki dei kiba sniew, ka long kaba bakla shibun, ka sorkar kam ju ai jingiarap ban pynsniew hynrei ka ai jingiarap na bynta ban pynbha bad pynroi ia ki shnong bad kum kine jingsngewthuh bakla la dei ban pynduh noh.
U la ong ka long ka jingkmen ia ki paidbah ka jylla Meghalaya, ba ngi ioh ban mane Blei laitluid katba ngi sngewbit haba nujor bad kiwei kiwei ki jylla ka ri India, namar ki don ki jylla kiba pyrkhing bha ia ki briew ban long Khristan, ha kaba ki hap ban ioh jingbit na ka sorkar ryngkat ki kot ki sla kiba biang ban long Khristan.