Don ka jingthmu ban shim ia ka jingim U MR, ong U DGP, julor 17 tylli ki kali, ha ka jingjia ha Tura

Shillong:U Director General of Police (DGP) u Dr. LR Bishnoi u la kam ba ka jingshah hiar thma ka jaka ba pynlong jingialang u myntri rangbah ka jylla u Conrad K Sangma ha Tura hynnin ka sngi, ka dei ka jingthmu ban shim wat ia ka jingim jong u Myntri Rangbah.

U la ong ba ha ka jingtohkit jong ki pulit, la lap ba dei ka jingthmu lypa, namar ba ki briew kiba wan ban pynshit ia ki paidbah da kaba pynkhreh ruh da ki umphniang sharak, ki jingpruid, ki siej, ki kyiad, la ioh kurup ia ka kali ba kit smam ka umphniang sharak ha kaba la pynkhreh ha ka miet 23 tarik shwa ban long ka jingialang ha ka sngi ba bud.

“Na kine ki sakhi, ka paw shai ba ka jingjia ha ka Tura hynnin ka sngi, ka dei ka jingthmu lypa ban pynmynsaw, wat ban shim da ki lynti ba shyrkhei pyrshah ia ka jingim jong u Myntri Rangbah”, la ong u DGP.
Ha kane ka jingjia, 17 tylli kali kynthup 4 tylli ki kali pulit kila julor, nalor ki 5 tylli ki kali ba synran lang ia u Myntri Rangbah, kali u MLA ka Williamnagar, ka ambulance ka la shah pynpait iit nalor kiwei. Ia ka jingjia la rejister kam ha ka ain bad ka jingshim kan nang shakhmat ia kiba donkti.

Halor kane ka jingjia, ki pulit, ki la phah bor pahara shuh sha Tura bad ka jinglong jingman ka la thanda ia mynta.
U la iathuh ba haduh mynta ka sngi, 23 ngut kiba la shah kem kynthup 21 ngut ki shynrang bad ar ngut ki kynthei na ki 26 ngut kiba shah kynnoh donkti ha ki jingjia ha Tura ha kane ka sngi Nyngkong katba 18 ngut ba kynthup ia 10 ngut ki pulit kynthup 8 ngut ki shynrang bad 2 ngut ki kynthei, 7 ngut ki CPRF bad kawei ka volunteer ka Home Guard. Ia kane la pyntip u Director General of Police u Dr. LR Bishnoi mynta ka sngi.

Katba u nongialam ba kongsan uba shah kynnoh kum u nongpynshit u Selseng R Marak uba la shah beh kam na ka tnad pulit, u dang phet rieh na ka jingthwet ki pulit.
Na kiba shah kem ki kynthup ia u nongialam ka TMC u Richard M Marak, ki nongialam BJP ka Dilche Ch. Marak, ka Belina M Marak bad kiwei kiba la shah kynnoh ban pynshit ia ki paidbah ban pynmynsaw ia u Myntri Rangbah.