Ka seng Congress, ka la ujor ba ka don ka jingma ia ka jingim jong U Rahul Gandhi, President jong ka seng Congress, ha ka por ba u leit sha Amethi ha Uttar Pradesh ban thep kyrteng ha kane ka taiew.
Ha ka shithi sha u myntri kam poh iing, U Rajnath Singh, ki lai ngut ki nongialam ka seng Congress, ki dawa ia ka sorkar India, ba kan tohkit bad lap ia kano kano ka jingthmu ba sniew lada ka don bad la ong ruh ba ka jingiada ia U President ka seng, ka dei ban long kaba iaid beit iaid ryntih.
Na ka liang jong ka seng Congress, ka pyni ba ka don ka jingshat jingshai kaba jyrngam, kaba phalang haduh hynniew sien ha shyllang jong U President ka seng Congress, ha ka por ba u iakren bad ki kotkhubor, hadien ba ula dep thep kyrteng ha Amethi.
Ka dei ha kaba kum kane ka por, ba ka don ka jingshat jingshai kaba jyrngam ba la thew bha ha ka khlieh jongu, ha ki hynniew sien hynniew wat bad kata ruh ha ka por kaba lyngkot bha bad katei ka kynthup ia arsien ha ka shyllang mat jongu.
Ha kawei pat ka liang, ka tnat kam poh iing jong ka sorkar India, ka pynshai mynta ka sngi, ba kato ka dak jyrngam, kaba paw ha shyllang jong U Rahul, ka dei ka dak kaba wan na ka mobile phone bad kam dei satia na kano kano ka suloi. La iathuh ba katei ka dak jyrngam, ka dei kaba wan na u nongshondur jong ka AICC, uba dang ring ia ka jingiakren jong U Rahul bad ki kotkhubor, ong u nongkren ka tnat kam poh iing, ha kaba ula shim ia katei ka jingkren, kaba ula ioh jingtip na u heh duh ka Special Protection Group (SPG).
Phi don ban ong eiei?