Don jingthmu ka sorkar ban kem ia ki MLA, ba kynshoit ILP?

Shillong, 14 Risaw:
La ka dei ne ka lait, hynrei ka khubor hamsaia ka her, ba ka sorkar Jylla, ka don jingthmu ban kem ia ki riew sain pyrthei kiba kynthup ruh ia ki MLA, MDC lem bad kiwei ki riew sain pyrthei, kiba donkti ban pynshit ia ki sengbhalang ban iakhih ia ka Inner Line Permit (ILP). Katkum ka khubor ba shu ioh sngew shane shatai, ka sorkar ka la pynshong nongrim bha ia ki briew kiba pynshit ia ka jingiakhih jong ki sengbhalang, khamtam ia ki politishian kiba ai jingkyrshan ban pynshit ia ka jingiakhih jong ki sengbhalang halor ka ILP ha kane ka jylla.
Kane ka jingthmu ka sorkar ka long kumba jia ha u snem 1979 ha ka por ba jur bha ka jingiakhih beh dkhar bad ha katei ka por, ka sorkar ba la ialam da u Bah BB Lyngdoh (bam kwai) ka la phah rah ia ki nongialam seng sain pyrthei kum Bah Martin Majaw uba dei na HSPDP ha kato ka por, Bah HS Shylla bad kiwei ki politishian kiba dei na ki seng sain pyrthei bapher bapher halor ka nongrim ba ki donkti ban pynshit ia ki jingiakhih.
Wat la kam dei eh ka jingthmu ban kem, hynrei kane ka buit ka sorkar, ka long ban shu rah ia ki nongialam sain pyrthei kiba ka shan khmat ba ki donkti ban pynshit ia ki jingiakhih da kaba buh sha ki jaka ba jngai khnang ba ki paidbah ne kito kiba pynlong jingiakhih kin ym lap ne iakynduh shuh ia ki.
La iathuh ba ha katei ka por, u Bah Bring u la leit buh ia ki nongialam sain pyrthei sha Tura na Shillong khnang ba ki nongpynshit kin ym ioh shuh ban kren ne iakynduh ia ki nongialam sengbhalang ba kin ai buit ne leh ia kino kino ki kam.
U Bah Paul Lyngdoh bad u Bah Ardent Basaiawmoit ki dei ki ar ngut ki rangbah ba shlur ban kren beit dain dain halor kane ka jingiakhih jong ki sengbhalang ban dawa ia ka ILP.
Kumjuh u MDC ka KHNAM u Bah Adelbert Nongrum u dei uwei uba nud ban kren bad ai jingkyrshan ruh ia ki sengbhalang.
Lah ban kdew ba ki 10 sengbhalang ki la pynlong ia ki jingiakhih naduh u Nailur haduh kine ki sngi ban dawa pyntreikam ia ka ILP ha kane ka jylla ban khang lad ia ka jingwan rung beain ki briew nabar kaba long ka jingma ia ki trai jaka.
Hynrei na ka liang ka sorkar, khamtam u Myntri Rangbah u Mukul Sangma u la pyneh triang ban ym khot iakren satia ne ban pyntreikam ia ki jingdawa jong ki sengbhalang.