Don jingthmu ban thaw sa kawei ka Battalion ha ka jylla, ong u bah Lakmen

Shillong:U Myntri ba dei ban peit ia ka tnad kam pohing, u bah Lakmen Rymbui, u la ong ba ka sorkar jylla ka don ia ka jingthmu ban pynkhlain ia ka tnad pulit ha ka jylla.

Haba iakren bad ki lad pathai khubor, na ka liang u bah Lakmen u la ong ba kum u myntri u ba dei ban peit ia ka Home police, u don ka jingthmu ban pynkhlain ia ka tnad pulit ha baroh kawei ka jylla.

U la iathuh ruh ba ka sorkar ka don ruh ka jingthmu ban thaw sa ia kawei ka Battalion na ka bynta ka jylla Meghalaya.

U la ong ruh ba ha ka tnad pulit ka donkam bun ki kam pynroi bad kumba long mynta bun ki jingkynnoh pyrshah ia kane ka tnad, kumta ban weng ia kine ki jingkynnoh na kane ka tnad ka donkam ban pynkhlain bha bad u la ong ba ka jingpynkhlain ia ka tnad pulit kan long da ki lad ki lynti, ban ym ktah ia ka pla pisa jong ka sorkar jylla, da ka ba pyndonkam ia ki bor pulit khamtam ha ki jaka khappud bad ha ki jaka kiba ym pat ju don pulit.