Don jingma ki niam bar ri ha Meghalaya?

Babu Kular Khongjirem

Hynnin ka sngi,ka sorkar MDA-2 ba la lamkhmat da ka party NPP+BJP+UDP, etc.ka la sdang ban ailad ia ka ktien Hindi hapoh Meghalaya Legislative Assembly lyngba ka jingkren u Lat da ka ktien Hindi.Ha ka jingshisha,kat haduh mynta,ka ktien Khasi/Garo ka dei ka 1st language namar ka dei ka ktien lajong(mother’tongue),ka ktien Phareng pat ka dei ka 2nd language ne ka ktien kaba ar bad ka Hindi pat ka dei ka 3rd language ne ka ktien kaba wan ha ka kyrdan kaba lai ha Meghalaya.Hynrei kane ka sorkar ba la lamkhmat da ka NPP,BJP, UDP, etc pat ka la pynkylla khongphong pynban da kaba pynlong ia ka ktien Hindi kum ka ktien kaba nyngkong(1st language) da kaba ailad ia u Lat ba un kren da ka Hindi.Ki paralok Garo i kumba ki kmen bha katba ki para Khasi pat ki sngap jar jar.

Mar ia sdang kane ka sorkar,la ai dak lypa ba ki paralok na Garo ki la sdang ban leh trai khlieh( dominate) ia ka ri Khasi-Jaintia jongngi. Ka dei ka buit barieh(hiden plan) jong ka sorkar BJP na Delhi ban thung khnang ia u Lat kum u ksiang(central political agent) da u bym nang ban kren Phareng ha ki Christian state ba shong ki ‘riewlum(tribal areas) kum ka Meghalaya khnang ba ka Hindusm kan treikam noh suki suki ha kum kine ki jylla.Ki tip bha na Delhi pyllein pyllein ba ha kito ki Christian State kum ka North East bad South India,ki briew ki kham khein kor,kham bang bad sngewthuh bha da ka ktien Phareng(English language) namar ka dei ka ktien ki nong Europe.Hynrei,ki BJP bad ki riew ngeit Hindu pat ki shun thlong mluh thlong sying bha ia ka niam Christian bad ka ktien Phareng namar kidei kiba wan na shabar ka ri India.Na kata ka daw, ki pyndonkam da ki party bad ki briew jong kito ki state ban da rap jot ia ka jingthmu bareh jong ki Hindu bad RSS nangthie na Delhi.Lyngba kane ka buit rieh jongki,suki suki kin sa jop ban pynduh jait ia ki Christian kumba ki la sdang leh ia ki Muslim ha Assam mynta.

Ka jingpynrung ia ka ktien Khasi bad Garo ha ka Khyrnit kaba phra(Eight Schedule) ka la kylla long pynban tang kum ka jingphoh sniew ruma namar ki nongialam jongngi kim nud saham satia ioh duh shuki ne duh iktiar.Dei hi ma ki kiba shet kylla ia la ka jong ka ri bad jaitbynriew lajong.Ki ia shah bad kyrshan pynban ia ki briew na Delhi ba kin iuh roit bad leh trai khlieh katba ki mon ia ka ri jongngi.Mynta ki la lah ban pyntroin ia ka party Congress bad sa ka thong kaba ar ka long sa ban pyntroin ia ki Niam nongwei kum ka niam Muslim bad Christian.Lada ki nongialam Niam kim sngewthuh ha kane ka por, bad kin dang iai ngat ha kane ka apot bad jingriam(political trap) jong ka BJP, kan sa poi ka por ba kin nym lah shuh ban khie khlieh namar ka BJP kan nion beit ia ki kumba nion ia ka party Congress ha kine ki snem ba la dep..