Don jingktah ka koit ka khiah na ki tnum mobile? rHukum ka High Court, ban wad jingtip ka sorkar jylla

Shillong, 19 Naitung:
KaHhigh Court ka la hukum ia ka sorkar jylla, lyngba ka tnad ka koit ka khiah ba kan leit jurip bad ban wad jingtip la ka jingieng ki Tower Mobile ka don jingktah ne-em ia ka koit ka khiah ki paidbah na ki Radiation kiba mih. Ka high Court kan bishar ia katei ka kam ha ka 29 tarik u naitung. Ka la ai jingtip ruh ia u Secretary, ka Telecommunication, ba un thoh da ka affidavit bad ia ka sorkar jylla pat ba kan wad jingtip shuwa katei ka sngi bishar.
Ka division bench ka High Court ba la khlieh da u Chief Justice Uma Nath Singh ka la pynmih ia katei ka hukum ha ka 15 tarik u naitung, la ka don jingma ne-em ia ki briew kiba sah iing hajan kitei ki Tower Mobile. Kham ha shuwa ia kane ka Court ka la ioh ia ka ripod ba la ai da u Director ka (TERM), NE-1 u Kulwinder Kumar uba la ong ba kam shym la don ka jingtip kaba paka ia ka jingmih ki Radiation na ki tnum Mobile bad ki tiar ki tar ba pyndonkam ban thew ia ka Radiation. Katei ka ripod kaba la mih ka dei hadien ba la don kiba ujor sha ka iing bishar ia ka jingieng ki Tower ka Reliance Telecommunications Ltd, Bharat Hexacom Ltd, Dishnet Communications Ltd. (Aircel), Bharat Sanchar Nigam Ltd, Idea Cellular Ltd, bad Vodafone Dislink Ltd.
Hynrei ka Division Bench ka high Court ka la shim ba katei ka ripod kam shym la kren shai bad ka dei tang ka jingkiar ban kren ia ki jingshisha bad kumta ka la hukum ia u Secretary, Telecommunication, ba un thoh da ka Affidavit jong u shuwa ka sngi bishar ka ban long ha ka 29 tarik mynta u bnai. Ka Court ka la shimkhia ia katei ka kam hadien ba u S P Das u la thoh ia kiba bun ki jingkynnoh kiba la mih pyrshah ia ka jingieng ki tnum mobile, ba la pynieng da ki kompeni mobile bapher bapher.