Don 88ngut ki khynnah, kiba ioh pang covid ha Mizoram

Aizawl: Kiba ioh pang covid ha Mizoram, ki don 440ngut mynta ka sngi bad kitei ki kynthup ia 88ngut ki khynnah rit, ong ka khubor na ka tnat ka koit ka khiah ka sorkar India. Baroh kiba ioh pang ha katei ka jylla, ki la poi sha ka 57,962 ngut.

Ka Aizawl, ka dei kaba bun eh kiba ioh pang, ha kaba ki don 310ngut, ka Mamit 74ngut, ka Kolasib 15ngut. Kiba iap, ki la poi sha ka 213ngut, ha kaba ka don kawei kaba iap mynta ka sngi, kaba 68 snem ka rta, kaba na Aizawl.