Dih sha saw ki nongkyndong, ba ai dud duna ki masi Sorkar

Shillong, 30 Naitung:
Ka jingdon jong ki masi khem dud ha kane ka jylla ka dang long tang khyndiat eh haba ianujor bad kiwei ki jylla ka ri India ha kaba ym pat lah ban pyndap dud nalade ia ka jingdonkam jong ki briew.
Haba iakren mynta ka sngi bad u Assistant Director ka tnad Ri Jingri u Dr KB Sahkhar, u la iathuh ba kumba ka long haduh mynta ki don tang 26458 tylli masi khem dud ha ka jylla baroh kiba pynmih ia ka dud 80410 ton.
“Kine ki masi khem dud ki dei katkum ka khanamusari ba dang shen ba la leh ha u 2012”, la ong u Dr Sahkhar bad bynrap ba ia ka khana sumari la pynlong shisien ha ka san snem.
Katkum ka jingia kren bad u Dr Sahkhar, ka jingpynmih dud ha kane ka jylla ka long kaba dang duna shaba palat bad haba khein kyllum, ka jingioh dud jong uwei u briew ha ka shi sngi, ka dang long tang 75 gram shi khlieh.
Kiba ioh ban dih dud ki dang long tang ha jaka sor bad kata ym pat dap bha bad sha nongkyn dong lei ki dang iadih da ka shasaw beit, la ong u Dr Sahkhar.
Katkum ka jingkhein, u briew u donkam ban ioh dud 220 gram ha ka shi sngi bad haba shim ia ka jingpynmih dud ka jylla Meghalaya pat, ka jingduna dud ka la long 145 gram ia uwei pa uwei u briew ha ka shi sngi.
Kiwei kiwei ki jylla kum ka Gujarat, Uttar Pradesh, Bihar bad kiwei ki lah ban pynmih dud haduh palat 300 gram shi sngi kaba mut ba ka la tam ia ka jingdonkam dud jong uwei u briew bad namarkata, ki la lah ban shalan dud kylla sha kiwei ki jylla.
U Dr Sahkhar u la iathuh ba ia kane ka dud, la pynmih na ki Masi phareng (crossbred) bad ruh ki masi local ne Khasi.
“Ki masi phareng ki pynmih dud 48460 ton bad ki masi Khasi ki pynmih 31950 ton ha ka shi snem”, u la ong. Ki district ba pynmih bun eh ka dud dei ka East Khasi Hills ba don 12807 bad ka ka Ri-Bhoi 9295 tylli ki masi. Kiwei pat ki district ki long ka West Khasi Hills 498, South West Khasi 331, East Jaintia Hills 622, West Jaintia Hills 633, East Garo Hills 196, North Garo Hills 241, West Garo Hills 1613, South West Garo Hills 134 bad ka South Garo Hills 40 tylli ki masi khem dud.
Ki masi shynrang pat don tang 5602 tylli ha baroh kawei ka jylla.
La iathuh ruh ba ki don 314 tylli ki shnong kiba ri masi phareng ha kane ka jylla kynthup ha East Khasi Hills 108, bad ka Ri-Bhoi 90. Kiwei pat ki district ki long ka West Khasi Hills 11, South West Khasi 5, East Jaintia Hills 10, West Jaintia Hills 20, East Garo Hills 20, North Garo Hills 0, West Garo Hills 40, South West Garo Hills 8 bad ka South Garo Hills 2.
Katkum ka jinglap ki stad, ki masi khem dud ki sdang ban ai dud hadien ba ki la dap 3 snem shiteng bad kin bteng ban ai dud haduh ban kha san sien bad hadien kane, ki la long tymmen bad ki duna ka jingai dud.