Shillong:Wat la ngi im ha ka juk kaba nadong shadong ki tiar ne ki marbam ne ki jaiñ ruh ki rem bha sha bneng sha khyndew hynrei ka long pat kaba sngewtynnad bad kaba sngewkmen ba kin don pat ki dukan kiba buh ia ki tiar ki tar bad ki jaiñ ki nep ha ka dor kaba jem bha.
Kawei na kita ki dukan ka dei ka dukan kaba la tip kyrteng kum ka Charity Shop kaba don ha ka dong dukan jong ka Sohra bad ki tiar ki tar kiba la buh ha katei ka dukan ki dei kiba la shu ai sngewbha bad la noh kylluid mynsiem da ki riew paidbah kiba kynthup ia ki jaiñsem, ki jaiñkyrshah, ki patlun, ki sopti, ki jacket, ki juti, ki kot pule, ki kot ñiam, ki bowl, ki pliang, ki mug bad bun kiwei kiwei de ki tiar kiba lah ban pyndonkam. Ia katei ka dukan la long trai da ka Kong H Kynta kaba shong kaba sah hi ha katei ka dong dukan.
Ia kitei ki tiar kiba la noh synniang da ki briew la die pateng pat ha ka dor kaba kham bit ha kaba ia ka jaiñsem la die ha ka dor 50 tyngka kawei, ka juti ka la die ha ka dor 5 tyngka shijur, ka pela ha dor 2 tyngka kawei bad kiwei kiwei de.
Ka Kong H Kynta ka la iathuh ba katei ka dukan ka la kamai la kumba 1 lak tyngka ha ka shisnem tam naduh ba la sdang ban plie ia ka bad kaba lyngngoh ka long ruh ba ki briew ki ia beh bha ban ia thied ia kitei ki peris bad ia ki kotbah rit kiba long ki jingmyntoi ha iing ha sem. Ka Kong H Kynta ka ong ruh ba ka jingdie ia ki kotbah rit ka la tam hajar tylli naduh ba la sdang ia kane ka lockdown kaba la don la shisnem tam mynta.
Phi don ban ong eiei?