Shillong, 23 Jymmang: Mynta ka sngi ki nongialam ka HYC Raid Nongtung Circle ki la leit khang ia ka dukan jong uwei u Nepali uba la tip kyrteng kum u Tilku Bahadur kaba don ha Mawlasnai.
Haba kren bad ki nongthohkhubor mynta ka sngi u President katei ka seng u bah Hercules Suting u la ong ba katei ka seng kham mynshuwa ka la ioh jingtip ba ka bor shnong jong ka shnong Mawlasnai ka la die duh ia kawei ka jaka kaba heh 600sq.ft ha uwei u Nepali uba la tip kyrteng kum u Tilku Bahadur bad katei ka seng ka la wad jingtip kiba bniah ban lap ia ka jingshisha.
Ki la sdang ban tohkit da kaba leit kylli na utei hi u nongthied ha kaba u la iathuh ba u la thied duh ia katei ka jaka. Kumta hi u ba Hercules u la ong ba ka HYC ka la khot ia u Sordar ban wanlang ryngkat bad u Bahadur ban ia kren bniah shaphang katei ka jaka bad ki nongialam katei ka seng. Hynrei u la ong ba ha ka sien ba nyngkong u sordar u bah Peter Thongni um wan bad sa shisien biang katei ka seng ka la khot ia u bad u lawan ryngkat u Bahadur bad ha katei ka jingiakynduh u la ong ba la ai ia katei ka jaka sha u Bahadur ym da kaba shu sie duh hynrei ki la don kikot ia teh ba ki la ia soi.
La phah ia u sordar ban wanrah ki kot ki sla,hynrei u la pan por shi taiew bad haduh mynta ruh um pat wanrah watla ka shi taiew ka la kut,ong u bah Hercules.Hadien ki nongialam katei ka seng ki la ioh ia ka kot ka sla bad ka pyni ba ia katei ka dulir la soi da u sordar barim katei ka shnong uba la khlad noh u bah F.Shadap bad la die ia katei ka jaka ha ka 28 tariku nailar,1999. Katkum ka jingong utei u nongialam ka HYC u la ong ba katei ka jaka jong u Bahadur ka dei kaba u la pyndonkam ban buh dukan bad ban shong ing.
Katei ka seng ka la pynpaw ka jingsngewdiaw ia katei ka jingdie jaka ka Mawlasnai sha u bar ri bad ka la ong ba katei ka buh jingma khamtamba katei ka thaiñ ka don ha khappud bad ka block II ka jaka ba dang ia kynad hapdeng ka jylla Meghalaya bad Assam. Ka HYC ka la dawa na u sordar ka Mawlasnai ba u dei ban pynduh pyndam noh ia katei ka dulir kaba la ai sha u Bahadur bad kala ong ba kan leit ujor ruh sha ki bor u Syiem Khyrim kumjuh sha ka District Council halor katei ka bynta. Shuh shuh katei ka seng ka la pynpaw ka jinglyngngoh namar katkum ka dulir la thoh ba u Bahadur u shong u sah ha Umwang hynrei utei u briew u don pat ka EPIC kaba na ka shnong Mawlasnai.
U bah Hercules u la iathuh ba ha ka 11 tarik mynta u bnai ki Nepali ki wan tih khyndew ha ka jaka jong ka kong Ribon Mukhim kaba sah ha Sabuda bad u la ong ba ki wan leh da ka bor khlem da pan jingbit na ka trai bad kila byrngem byrsit ruh ia ki trai jaka.
Phi don ban ong eiei?