Shillong,17 Nailar:
U Myntri ka Hima Mylliem uba dei peit (Incharge) ia ka Iewduh u Myntri K.Langstieh u la kren diaw halor ka jingshah thang jong ki ar tylli ki dukan die jain ha Iewduh da kaba ong ba kum kitei ki jingjia ki dei kiba ka Hima kam ju khmih lynti ba kin jia khamtam ha ka por bym dei ka pakhang shnong . “Ngi sngewsih ban jia kum kine ki jingjia , khamtam ha ka por bym dei satia ka pakhang shnong” ong u Myntri Langstieh hadien ba u la wan jurip dalade hi ia kitei ki ar tylli ki dukan ba la shah thang.
Haba ia kren bad u Rupang u Myntri ba dei peit ia ka Iewduh u la ong ba katei ka jingjia ka la pynher syrngiew bad pyntieng pynsmiej ia ki nongiew nonghat kiba la wan ban ia die ia thied ha Iewduh bad katei ka ktah ruh ia ka ioh ka kot kaba ki paidbah ki im ja kpoh lyngba ka iew ia die iathied. “Ka long ka jingduh nong ia ki nongrep ha kaba tang na ka daw ba ki briew kim nud shuh ban tur sha iew ki la hap ban die tad noh ia ki mar-rep jong ki, ha ka jaka ba kin die T.100 ki hap ban die tang T.50 tyngka” bynrap shuh shuh u Myntri Langstieh.
Haba la kylli hato ka Hima ka don aiu ban ong sha ki paidbah nongshong iew khamtam ki dkhar kiba la khang khyrdep lut ia la ki dukan tang marsien jia katei ka jingjia, u Myntri u la ong ba kim dei ban khang khyrdep hynrei ki dei ban plie ia ki dukan jong ki kumba ki ju leh manla ka sngi. “Ngi kyntu ia ki ba kin ia plie ia ki dukan jong ki ha bym don kino kino ki jingpynbna pakhang shnong-ym dei ban tieng ” ong biang u Myntri Incharge ka Iewduh.
Shuh shuh u Rupang haba ia kren markhmat bad u Bah Langstieh u la kylli hato haba la jia kum katei ka jingjia kaei ka lynti kaba ka Hima kan pyrkhat thymmai ha kaba ia dei bad ka jingshngain ki nongshong iew (Security) u Myntri Langstieh u la ong ba ki la don ki pulit ka Hima kiba iaid pahara baroh ka iewduh bad kitei ki bor pahara ka Hima Mylliem kin peit siar bha nangne shakhmat ban peit ba kan ym mih kino kino ki jingjia ba sngewsih ha Iewduh. “Lehse ha ka por ba ka jingjia ka la jia ha Basa Kwai ki bor pahara ki dang iaid pahara sha kiwei pat ki bynta ka Iewduh” pynkut u Myntri Langstieh uba la iathuh ruh ba ka Hima Mylliem ka don kumba 30 ngut eiei ki pulit pahara ha Iewduh.
Phi don ban ong eiei?