Shillong:Ki seng saiñ pyrthei ba don ha ka Liang Pyrshah hynnin ka sngi ba-ar, ki la pynpaw ïa ka jing sngewkhia halor ka jingbym kren eiei u Lat halor ki sienjam ba la shim da ka Sorkar ban leh eiei ïa ki kam ba kongsan ka Jylla kynthup ka jingwan rung kyrthep ki bar jylla sha Jylla.
“Ka jingkren lamphrang u Lat kam shym la kdew satia ïa ki sienjam ba la shim da ka Sorkar ban leh eiei halor ka jingrung ki bar jylla, ka jingshngaiñ bad jingïada ïa ki paidbah ba sah ha khappud,” ong u MLA ka Congress na Umsning Dr Celestine Lyngdoh haba ïashimbynta ha ka jingïatai ïa ka jingkren u Lat.
Ula ong ba u Lat u khlem kren eiei ïa kiba bun ki jingbym lah treikam jong ka Meghalaya Energy Corporation Limited (MeECL) bad ka jingbym lah pyntrei bha ïa ka Jal Jeevan Mission ha ka Jylla nalor ka sienjam ba la shim ban pynthikna ïa ka jingtreikam haba shit haba shai ha ka synshar khadar.
U MLA ka VPP na Nongkrem Bah Ardent M Basaïawmoit ula ong ba u Lat ka Jylla, u khlem kren eiei halor ka kam ban pynrung ïa ka ktien Khasi ha ka khyrnit ba phra jong ka Riti Synshar ka Ri India.
Ula kynnoh ruh ba ha kine ki san snem ba la leit, ki paidbah ki la im ha ka jingtieng bad la pynbor ruh ïa ki briew ba kin shim ïa la aiñ ha la ka jong ka kti haba ai nuksa ïa ka jingjia ha kaba saw ngut ki runar ki la shah bomïap ha ki paidbah ha Shangpung, West Jaiñtia Hills District.
Halor ka kam khappud, u Bah Ardent ula ong ba ka Sorkar kam dei ban ai ei ïa ka jaka ba kordor sha ka Assam ha ka kyrteng jong ka jingïapynbeit pud.
“Nga khuslai naba ka jingleh kyrkieh ïa kano kano ka kam ka lah ban lam sha ka jingbijai ei,” ula ong haba kdew ïa ka jingïakren khappud ba dang ïaid mynta ban pynbeit ïa ki hynriew tylli ki jaka ïakajia ba dangsah.
Ula ong ba khlem pep, ka kajia khappud ka dei ïa kaba hap ban pynbeit hynrei bun ki shnong ha ri-lum Khasi kila leit sha Assam namar ka MoU.
Haba ïaroh ïa ka jingtrei shitom jong ki Pulit ban ïakhun ïa ka thma pyrshah ïa u drok ha Jylla, u Bah Ardent ula kdew ïa ka jingdonkam ban leh tyngeh ïa ki nongkhaïi drok bad pynthikna ba kin shong slem bha ha along.
Ula kyrpad ruh ïa ka Sorkar Jylla ban buh noh ïa la ka jong ka rehab centre haba buh ha ka jingmut jingpyrkhat ba ka jingsumar ïa kiba la ngop ha u drok ka dei kaba rem dor bha bad ka dei ka jingeh ïa kiba bun ki Kmie ki Kpa.
Une u nongïalam ka VPP ula ai jingmut ïa ka Sorkar ban pynïadon bynta ïa ki stad ki jhad jong ka Jylla ha ka State Education Commission.
Dei Beit ban nym ailad ia ka sorkar ba kan shu sngap ia kaba dei hok ban leh na bynta ka Kam iap Kam im Jong u paidbah. Ka MoU kaba dei ban pynjanai bha khnang ba ka shongsuk shongshngain kan long kaba tikna.
ha u prah beit wat lada khlm jop na mylliem ruh nga sngew kumba jop lang u prah na mylliem ba triem plt arden