Diaw ka KSU Wapung, ba shah pyniap ka khynnah Klas X

Shillong: Ka Khasi Students Union Wapung Unit ka pynpaw ia ka jingsngewsih bad jingsngewdiaw ha ryngkat ka jingpynrem jur halor ka jingjia kaba pyntieng pynsmiej ia ki nongshongshnong, haba kawei ka khynnah skul kaba kaba dang pule klass X ha Wapung Higher Secondary School kaba shong kaba sah ha Pamrakmai, East Jaintia Hills ka la duh noh ia ka jingim ba kordor jong ka bad ba ia ka met jong kane ka khynnah skul la lap ha Ar-Kilo, Dkhiah East, East Jaintia Hills District. Kane ka jingjia ka lah buh jingma ia ki nongshongshnong khamtam ia ki kynthei khynnah.

Kane ka jingshah pyniap kane ka khynnah skul ka la pynsuhjer bad par niangkhriat ia ki nongshongshnong namar kane ka jingjia ka lah pyntieng bad pynsmiej ia kiba bun ba lang. Kumban shu pynkynmaw ba dang shen ha shnong Sohkymphor ba kawei ka khynnah skul ba pule klas IX ka lah lap ia kajuh hi ka apot. Ka jingdkhoh ka jingtrei ki bor police ka pynlong ia ki runar ba shlur ba leh ia kum kane ka kam. Bad haduh katne kim pat lap satia ia kiba donkti ba leh ia kane ka kam ba shyrkhei.

Ka KSU Wapung Unit lyngba kane ka kyrwoh ka kyntu ia baroh ki nongshong shnong jong ka thain East Jaintia, naduh ki nongialam shnong, ki sengbhalang, ki seng samla shnong, ki seng longkmie, ba ai ka jingtrei ba peit pyrman ia ka jinglong jingman jong ka imlang sahlang ha ryngkat ka kongiatrei lang bad ka ain khamtam ha kum kane ka jingjia.

Ka KSU Wapung Unit ka kyrpad ruh ia ka sorkar bad pynkhlain bad pynstet ia ka jingtohkit bad ban leh tyngeh ia ka jingthwet ia ki runar bad pynshitom da kaba tyngeh ia ki.

Ka jingkylliang khah ia ki opisar jong kano kano ka department ka pynthud ia ka jingiaid beit jong ka jingtohkit, namar ha thain East Jaintia la lap ia ka jingkyliang khah khah ia ki opisar bad kane ka pynlong ha ka jingdkhoh ha ka rukom tohkit.

Ka KSU Wapung Unit ka phah ia ka jingsngew lem sha ka ing ka sem ba ngat ha kane jingjia bad ba kin ioh ia ka hok.

Ka KSU Wapung Unit ka ai ia ka jingtrei lang ba ki bor ka ain ba thwet ia ki ne ki riew-thrangsnam haduh haban da lap ia ki.