Dheng kali ba ap tulop ki Home Guard bad ba rung ki trok ha Iew Mawlong

Shillong,12 Jylliew:
Ka jingbuh jong ka sorkar ia ki pulit Home Guard ha ka jingpyniaid kali ryngkat ryngkat bad ki pulit Traffic ka jylla ka la iarap shisha ban tehlakam ia ka jingdheng kali ha Sor Shillong. Hynrei tang shisngi ba kitei ki pulit Home Guard kim don ha ka Duty jong ki la iohi ba ka jingdheng kali ka la jur bha. Hadien ba la wad jingtip ia ka jingduna ki pulit home Guard ha ka jingpyniaid kali mynta ka sngi u nongthohkhubor u la lap ba ka daw ka dei ba bun na ki ki la lap miet ha kaba ia ieng lain ap tulop ha Mawdiang diang.
Ha kane ka juk stad mynta ka la tuh shisha ia ka por trei jong ki nongtrei haba sam tulop da kane ka rukom kaba hap ban shu ia ieng lain namarba bun hi na ki tnad treikam ym tang ha ki ophis sorkar, hynrei wat ha ki Private Company ruh ki siew tulop beit da kaba thep ia ki pisa ha ki account jong ki nongtrei, bad lehse lada katei ka tnad Home Guard kan siew tulop da kaba thep ha ki account jong ki kan ym tuh ia ka por trei jong ki bad kumjuh ruh kan ym wanrah jingeh ia ki paidbah.
Shuh shuh katei ka jingdheng kali, ka la jia ruh ha Them Iew Mawlong ha kaba da ki bun bun kynta ki kali ki la shu ieng thad sngi hapdeng surok tang na ka daw jong ka jingwanrung ki trok heh ha katei ka jaka paidbah kaba la khim shisha wat tang ia ki kali rit.
Lai ne saw tylli ki trok kiba pynhap marbam ha ki dukan heh kum ki phan , piat, umphniang bad kiwei ki la pyndik shisha ia ki kali rit kiba dang iaid ha ki Thain ka them Iew Mawlong ha kaba wat na ka liang ki pulit traffic ruh kim shym la beh satia ia ki hynrei kiba la leit wad jaka bha pynban ban pynieng ia ki. Ho.oid, la pynmih ia ka hukum bay m shah ia ki trok ba palat ia ki shiphew shaka ban rung ha katei ka surok ha ka por mynsngi hynrei mynta pat la rung pynban da ki trok heh saw bad hynriew shaka ban pynkhapngiah ia katei ka surok.