Deng lama iong; iaid proseshon ki nonghikai NEHU

Shillong, 12 Nailar:
Kum ka dak ban pynpaw ia ka jingpyrshah jong ki, ia ka jingpyn khamti ia u Prof A.N Rai kum u Vice Chanchellor ka NEHU, mynta ka sngi ki nonghikai katei ka skulbah kiba don ha ka kynhun kaba la tip kum ka North Eastern Hill University Teachers’ Association (NEHUTA) ki la deng lama iong bad iaid da ka proseshon.
Ki nonghikai ka NEHU ki la dawa ba u VC ka NEHU u Prof. Shukla, u dei ban hiar noh na ka shuki jong u ha kaba ki la kynnoh ba u la pynkhein ia ki kyndon treikam katei ka skulbah da kaba thung bad pynkhamti da ka mon jong u hi ha u Prof. A.N Rai, kum u VC Incharge ka NEHU.
Kat kum ka jingkren ki nonghikai katei ka skulbah, ki la ong ba ka la don ka kyndon ba lada jia ba u VC ka NEHU u don shabar jylla, ne lada jia ba u don ha ka shuti ia ka kam VC Incharge dei ban pynkhamti ha uno uno u Professor, uba la kham rangbah bad uba la shakri rim tam ha katei ka skulbah.
Ki la don kumba 30 ngut ki nonghikai kiba la deng lama iong bad iaid proseshon, ki la sdang ia ka jingiaid proseshon jong ki naduh na Library haduh ka ophis u VC kaba don ha Administrative Building jong katei ka skulbah. “Ki kyndon treikam ki kren shai lada u VC bad u Pro-VC ki leit jingleit ne shim shuti, ia ka kam dei ban bynshet ha u nonghikai uba la kham rangbah bad uba la shakri kham slem ha kane ka skulbah, hynrei kumba ka paw mynta u Prof. Shukla u la pynkheiñ ia kane,” ong u Prof. Vanlal Rauta Rengsi, President ka NEHUTA, haba kren sha ki nongthohkhubor, hadien ba la aiti ia ka dorkhas sha u Acting VC uba don mynta sha Delhi.
Ki nonghikai ka NEHU, ki la pyntip ruh ba ia katei ka dorkhas ki la phah lang ruh sha u Pranab Mukherjee, President ka ri India, uba long u Visitor kane ka skul bah bad sha ka Ministry of Human Resource Development (MHRD) ba kin leh ia kaba donkam. Ki nonghikai ka skulbah NEHU ki la kynnoh ruh ba u Prof.Shukla u la pynkhamti ha u Prof.Rai namar ka jingmyntoi shimet jong u hi.