Shillong: Tang hapoh khyndiat kynta ba la lap ia ka met jong ka Kong Damonica Laloo, ha ki bynta ba shapoh jong ka Trattoria Restaurant, kaba don ha Central Ward Barik Lachumiere, ki pulit ki la ioh ban kem ia u wei u briew u ba donkti ban shim ia ka jingim jong kane ka longkmie.
Une uba la shah kem u dei u ba la tip kyrteng kum u Sunai Singh 42 ka rta bad u dei u ba ia trei lang bad kane ka longkmie kaba la shah pyniap.
Ha ka kyrwoh ba la phah da u Superintendent of police (SP) ka East khasi Hill, u bah Vivek Syiem u la kdew ba na ka liang Ki pulit ka Sardar Police station la ioh jingtip mynta ka sngi ha ka por 10:20 baje ei ei na ka trai jong ka Tratoria Restaurant, Central Ward Barik Lachumiere, u Batskhem Suting, ba kawei na ki nongtrei kane ka restaurant ka la shah pyniap, ha ki bynta ba shapoh kane ka restaurant.
Mar ia ioh jingtip na ka liang ki Pulit Sadar PS ka la leit sha katei ka jaka bad ki ophisar pulit ha ryngkat ka kynhun FSL Crime Scene Unit bad la sdang ban tohkit ia kane ka kam.
Kane ka longkmie kaba la khlad ka dei kaba la tip kyrteng kum ka Kong Damonica Laloo,41 snem ka rta bad ka trei kum ka nongpynkhuid ha katei ka restaurant.
Da kaba pynshong nongrim ha ki sakhi ba la lum da ka jingiarap jong ki kynhun FSL bad CSU kaba wad bniah bad ha ka jingtohkit kaba sdang la suba jur ia u Sunai Singh 42 snem ka rta uba dei u nongtrei lang ha kane ka resturant.
Une u briew u la kubur ba u donkti ha kane kam runar bad u la pynpaw ba ka jingthmu ba shadien jong ka jingshim ia ka jingim kane ka longkmie.
Kat kum ka jingiathuh Jong u Singh ka long ba kane ka la jia ha ka por 11 baje mynmiet, ha ka 27.02.2025 ha ka hadien ba u la buaid shoh khawiang ka la mih ka jingkajia hapdeng jong ki.
Hadien ba u la dep ban shim ia ka jingim kane ka longkmie u la pyrshang ban buhrieh ia ka met jong ka shadien u Transformer ka KJP Assembly Conference centre.
U bah Vivek Syiem u la iathuh ba la ioh kurup ruh ia ki nar ba u Singh u la pyndonkam ban shim ia ka jingim jong kane ka longkmie.
Ia ka jingtohkit kaba kham bniah ka dang iaid shakhmat ban pynskhem ia baroh ki jingiadei bad ka kam runar kat ba ia ka met ba sah jong ka Kong Damonica la pynkit noh sha NEIGRIHMS Hospital na ka bynta ban pynlong ia ka Post Mortem.
Ia ka case la register ha Sadar Police station bad yn sa lah ban pynmih shwa ia u ha ka iingbishar.
Phi don ban ong eiei?