‘Dei u snem bha’pyni dak ka shat ka khan na Baniun

Shillong, 3 Iaiong:
Kumba ju long manla u snem, ka Sengbah ki Nongshat Nongkhein ki ju pynlong ia ka jingleh leh rukom bad ka khor khriam kaba shisien shisnem ha ka ing bah ki Nongshat Nong khein kaba don ha Baniun, Upper Shillong. Na ka bynta mynta u snem la pynlong ia katei ka shat ka khan mynta ka sngi ha katei ka juh ka jaka kaba la ju pynlong. Haba ia kren bad Rupang hadien ba la dep ka niam ka rukom u General Secretary ka Sengbah Ki nongshat Nongkhein u bah Jubanlak Hynniewta u la ong ba ka shat ka khein ka pyni ba mynta u snem u dei u snem bha, ‘la ot ki ‘iar kynthei shynrang, ym don dak sniew eiei , ka pyni ba mynta u snem u dei u snem bha’ ong u bah Jubanlak. La sdang ia katei ka niam ka rukom naduh ka por mynstep haduh ka por 12 baje tam ne duna, bad ha katei ka lehniam la wan ban sakhi da ki spah ngut ki paid riew ngeit niam tynrai na kylleng ki jaka. Hadien ba la dep ka niam ka rukom bad ba la pynshai sha ki paidbah kiba la wan sha katei ka jaka la sdang ruh ka jingiashad ia kmen bad ka ia rwai ka ia risa ha lympung shad kaba don ha katei ka jaka. Ha shuwa ia kane ki rangbah nongshat bad ki tymmen ki san ka Seng Khasi ki la pynkiew ia ka lama jong ka Seng Khasi.
Lah ban pynkynmaw ba ha u snem ba la dep ha kum katei ka sngi ba la pynlong ia ka jinglehniam u Lat barim ka jylla u RS Mooshahary ryngkat u Deputy Commissioner ka East Khasi hills u Sanjay Goyal ki la wan ban ia shim bynta lang.