Dei u Nepali uba pynshit, ong u MLA ka Rambrai, ujor sha MHRC

Shillong: U MLA ka Rambrai konstitwensi u bah Kimfa Sidney Marbaniang mynta ka sngi u la leit ban ujor sha ka Meghalaya Human right Commission (MHRC) pyrshah ia ki pulit Assam kiba la thombor ia ki Khasi mynhynnin ka sngi ha ka shnong Umwali, Langpih. U bah Kimfa Marbaniang u la ong ba ka jingleh donbor jong ki pulit Assam ka dei na ka daw ka jingpynshit jong ki khar Nepali bad katei ka kam ka la sdang na ka pynshit jong uwei u khar Nepali bad u la ong ba mynhynnin ka sngi u la thalaiñ tyngeh ia utei u briew.
U bah Kimfa u la ong ba un ujor ruh sha ka Meghalaya State Commission of Women (MSCW), sha u myntri kam pohing ka sorkar jylla bad sha u Chief Secretary ka jylla halor ka jingjia kaba la jai mynhynnin ka sngi. U la ong ba ki pulit Assam ki la kynnoh ba ka jingiakynad ka mih na ka daw ka jingkawang maw jong ki Khasi hynrei u la kyntait ia kane bad u la ong ba ka dei tang ka jingaidaw jong ki pulit Assam hynrei ka daw ka dei beit na ki Nepali.
Ha kawei pat ka khubor, ka Hynniewtrep Youth’s Council (HYC) ka la leit ban ujor sha ka Meghalaya Human Rights Commission (MHRC) pyrshah ia ki pulit Assam halor ka jingjia kaba la jia mynhynnin ka sngi. U President ka HYC u bah Robertjune Kharjahrin u la ong ba ka jingleit ka ban mudui ha ka MHRC ka long ban pynskhem bad pynshisha ia ka jinglong trai ia ki jaka ha ka thain khappud bad ka Assam kynthup ia ki shnong ha Langpih. U la ong ba ka jingthombor ia ki Khasi ka dei ha ka jaka jong ki Khasi hi, ha West Khasi Hills bad ki pulit Assam ki dei ban wan jubab ruh ha khmat ka Commission ha Meghalaya.
U la dawa ba ka MHRC ka dei ban thung kynhun tohkit ban pynshitom ia kiba donkti ban thaw jingkulmar bad ban pynngat ha ki kyndon jong ka ain ia ki pulit Assam kiba donkti ban shoh ban dat ia ki Khasi bad ban siew bai lutksan ruh sha baroh kito kiba mynsaw bad ban pyllait mardor ia kiba shah kem ba kynthup ia u nongniah kali jong ka MEPCL bad u Secretary jong ka shnong Umwali.