Dei tang 3 ngut kiba don mukotduma ha Them Lum Survey, ong ka HYC

Shillong:Ka Hynñiewtrep Youth Council (HYC) ka la dawa na u Deputy Commissioner (DC) ka East Khasi Hills ba u dei ban pynlong da ka jingleit pynshisha hapoh ka jaka (Spot Verification) ïa ki nongshong shnong ha Lum Survey.

Haba kren sha ki lad pathai khubor ha ka sngi Palei u President ka HYC u Bah Roykupar Synrem ula ong ba ka jingleit pynshisha hapoh ka jaka (Spot Verification) ha Lum Survey ka dei ban long hapdeng ka ophis DC, ka tnat Defence Estate Office (DEO), ka Shillong Cantonment Board (SCB), ki Pulit bad ryngkatlang ka seng HYC.

U Bah Roykupar ula ong ba ka seng kam lah ban pdiang ïa ka jingkam u DC ba ïa ka mynta ym lah ban kyndang ïa kiba sah beaiñ ha Lum Survey da kaba kam kane ka jaka ka don hapoh ka Ïingkashari.
“Ka ophis DEO ka la jop ïa ka Case ban kam trai ïa ka jaka naduh 2006 bad ka la phah Notice ruh sha 3 ngut kiba seng dukan ha kane ka jaka,” la ong u Bah Roykupar.

U Bah Roykupar ula ong ba ïa kaba mynta ka Case ba don ha Court kadei thik hapdeng ka DEO bad 3 ngut kiba seng dukan ha ki jaka ba rit kumba 400-500 sq ft hynrei baroh ka jaka kadei hi ba long trai da ka ophis DEO.
“Ngi la thoh sha ka ophis DC, DEO bad SP ka East Khasi ba kidei ban leit pynshisha hapoh ka jaka ha Lum Survey ha ka jingdonlang kiba sah ha kato ka jaka ban pynshisha ïa ka jingwan shong beaiñ ki briew ha kane ka jaka,” la ong u Bah Roykupar.

Nalor kane u Bah Roykupar ula ong ba lada ki bor district kim leh eiei halor kane, ka seng kan shim da kiwei ki sienjam bad ki bor district kin hap ban bah khlieh.