Shillong, 11 Naiwieng:
Ka Myntri ka tnad kamsor ka jylla ka Kong Ampareen Lyngdoh ka la pynksan da kaba ong ba ka jingkhynra ia ki iing jong ki briew ha ka thain Umsawli, dei kaba la leh katkum ka ain bad ka Kashari ruh ka la ong ba ki dei ki briew kiba shu wan skud jaka jong ka sorkar.
Ka Kong Ampareen ka la ong ha ki nongthoh khubor mynta ka sngi, ba ki iing briew kiba shah kyndang ha Umsawli, ki dei kiba shu sah beain bad namarkata, ym donkam ban phah jingtip sha ki haba leit khynra. “Ka Kashari ha ka rai ha ka 20 tarik Risaw, ka la pynksan ba ka jaka ha Umsawli, dei jong ka sorkar”, la ong ka Kong Ampareen.
Mynshem taiew, ka tnad Meghalaya Urban Development Authority (MUDA) ka la pynlong ia ka jingkyndang ia ki iing jong ki briew ha thain Umsawli ban shna ia ka sor Shillong ba Thymmai hynrei na ka liang ka CSWO hapoh ka jingialam ka president ka Kong Agnes Kharshiing ka la pyrshah ia kane ka jingleh ka sorkar bad ka la khang pyrshah. Halor kane, ka la shah kem noh ha ki pulit hadien ba la ujor FIR da ki nongtrei ka MUDA da kaba kynnoh ba ka khang pyrshah ia ka jingthmu ban kyndang ia ki iing briew.
Ka Kong Ampareen ka la ong ba ka sorkar ka long kaba kloi ban iakren ia kane ka kam bad kito ki briew kiba shah ktah na ka jingkyndang, tang lada kim pynkhein ia ka ain.
Katkum ka jingong ka Kong Ampareen, ka MUDA ka kwah ban iaid ia kane ka kam katkum ka jingdonkam bad ki heh ka MUDA ki kwah ban pynlong ia ka jingtohkit ia ki briew kiba sah ha katei ka jaka hynrei kim treh satia ban iatreilang.
Ka la pynpaw ia ka jingsngewkhia ia ka jingslem bansdang ia ka jingtrei ia ka NST bad ka la ban ba lada lah ban thaw ia ka Sor Shillong Thymmai, kan iarap ban pynlait ia ka jingkhapngaih na kane ka sor kaba rim hynrei kane ka jingthmu ka slem namar ba la shah pynwit palat na ki briew.
Ki heh ka MUDA ki la iathuh ha ka myntri, ba ar tylli ki jaka la ai sha ka NEEPCO bad sha ka IT Department ha u snem 2010.
Katkum ka kaiphod jong ka MUDA, ki nongsurbe ki la aiti sha ka Kong Ampareen ha kane ka sngi Nyngkong ia ka jingleit khynra ha ka 8 tarik Naiwieng bad ki la batai ia ka jinglong trai ia katei ka jaka ha kaba la don kiba ka Kashari ka la dep shah ia ki ban kyndang ia kiba sah beain hadien ba kim sngap ia ka jingthoh ba la ai da ka sorkar ba kin mih noh.
Ka kaiphod ka la ong ba ka Agnes Kharshiing ka la wan mih ha katei ka jaka bad ka la kren pyrshah ia ki nongtrei ka MUDA bad pynshit ia ki briew ha katei ka shnong kiba la wanrah ia ka jinghuri hura. Ha kane ka jingkhynra, hynniew tylli ki iing phlang, ar tylli ki sem masi la pynkyndang namar ba ki skud ia jaka sorkar.
Phi don ban ong eiei?