“Dei ka sorkar mynta” kaba plie ia ki LCS thymmai

Shillong, 20 Risaw:
U Superintending Technical Shillong jong ka Customs bad central Excise, u la kren da kaba shai kdar ba, ia mynta dei tang ka sorkar jylla kaba lah ban pan jingbit ban plié ia ki Land Customs Station (LCS), kiba thymmai, ka ophis kan nym pdiang lad aka wan na ki kynhun ne ki riew shimet, la ong U S. Choudhury.
U Superintending Technical, u la ong ba kin phah sha ka sorkar pdeng tang ia ki aplikeshon kiba la pan da ka sorkar jylla, namar kam lah ban long ia ka tnad customs ba kan pdiang ia ka jingpan jingbit jong ki riew shimet ne ki kynhun ban plié ia ki LCS thymmai.
La iathuh ba ki don ki riew shimet kiba la wan ban pan jingbit ban plie ia ki LCS thymmai, kaba hap hapoh jong ka Dawki LCS ha East Khasi Hills District bad ia kine ki la phah sha ka sorkar jylla, ha kaba ia dei bad ka Kalibali kaba hap hapoh jong ka Shella LCS, u la ong ba haduh mynta kam pat don kano kano ka jingwan pan jingbit.
Ki LCS kiba dang sah kut bad ka sorkar jylla mynta ki don ar tylli kawei ha Umkiang hapoh jong ka East Jaintia Hills District bad kawei ka dei ha Beltoli ha East Khasi Hills District bad kine ki jaka lada ka sorkar ka ioh jaka yn plié da ka surok ban iaid ki kali ban rung sha Bangladesh.
Ki LCS kiba dang shna mynta ha kane ka jylla Meghalaya ka long ka Dalu bad Gashuwapara, Kaba ha Gashuwapara mynta la jan dep tei. Kano kano ka jaka ban don ia ka LCS mynta ki dei ban biang ki jaka ieng kali ki ophis na ka bynta ki Customs bad kum juh ia ki nongkhaii.
Na ka liang jong ka Director jong ka tnad Commerce bad Industry jong ka sorkar jylla ka kong MB Roy, ka la ong ba ia mynta kam don kano kano ka jingpan jingbit ban plié LCS thymmai, haba ia dei bad ka Kalibali ban plie biang ia ka la ong ba kam pat don kum kata ka jingthmu.
Na ka liang jong ka Chhatak Limestone Importers and Suppliers Group na Bangladesh kala kyrpad ia ki exporter na kane ka jylla ba kin thoh sha ka sorkar pdeng jong ka Ri India ministry jong ka Finance department of Revenue New Delhi ban plié ia ka Beltoli export point ban iaid da ki kali lane ka car pass na u Pillar number 1243/3T-1243/2ST na Beltoli ha India bad Sunamgonj District ha Bangladesh ia kane ka shithi la soi da u SA Selim Chowdhury president. (SP News)