Shillong, 15 Nailur:
Ka Khasi Students’ Union (KSU) Seng Kmie, ka pynpaw ïa ka jingaikhublei kaba kyrpang eh ïa ki paidbah baroh kiba don ha kylleng ka bri u Hynñiew trep Hynñiaw wasa na ka bynta ka jingkyrshan kaba pura kaba ki la ai ha ki prokram jingïakhih ba la khot pynlong da ka kynhun ki sengbhalang ban pynbor ïa ka Sorkar ba ka dei ban pyntrei kam noh mardor ïa ka Inner Line Permit (ILP) hapoh ka jylla hi baroh kawei.
Ha katei ka kyrwoh, ka KSU, ka ong “Ngi kwah ruh ban pynkynmaw biang sha phi ki paidbah, ba kum ki sengbhalang ngim shym la jied mon sngewbha ban khot pynlong ïa ki jingïakhih kiba jur, hynrei dei ka Sorkar kaba la pynbor bad ieh ïa ngi satang da kane kawei ka lad; bad kata ka long ban ïakhih da kaba tyngeh ryngkat bad phi u paidbah”.
Ka KSU, ka ong ba la bun bun snem, ki la la ïai ap, ki la pynlut ruh shibun ka por ha ki miej jingïakren lyngba ka High Level Committee kaba la thung hi da u Myntri Rangbah ha u snem ba leit, hynrei ka seng ka kren bynniaw, ba ha kaba kut kine ki komiti ki paw shai kdar ba ki long tang kum ki rynsan ïatai ban pynbijai kai ïa ka por.
“Kumta, parari wat leit ngop ha ki jingpynsngewthuh bakla jong no re ba ki sengbhalang ki ïakhih ban pynduh bainong sngi ne ban pynduh bai khaw ïa la ki jong ki doh ki snam” ong ka kyrwoh, ha kaba ka la ong shuh shuh ba ki seng bhalang, mynta ki don da kawei ka sur bad kata ka long “Pyntreikam Noh Mynta Ïa Ka ILP, Khlem ILP ngin ym shongkli kti”.
Ka KSU, ka ong shuh shuh “Khlem kane ka aiñ ngi ki Trai Ri Trai Muluk kiba tang shitroh ha ka jingbun paid ngin sa shah rong noh ne shah tyllep syndon ha ka umsaw kaban pynkylla long ïa ngi ki Mynder ha ka la ka jong ka Ri”.
Katei ka kyrwoh, ka kyntu bad buh ruh ka jingkyrpad ïa ki dkhot ka Seng KSU baroh naduh ki Unit, Circle bad District unit ba kin ïa mih shakhmat ban pynurlong ïa kane ka jingdawa bad ban shim khia lada ki sengbhalang ki buh ïa kano kano ka prokram ïakhih nangne shakhmat. “Ngi duwai ba u Blei Nongbuh Nongthaw Un Kyrkhu bad don lem don ryngkat lem bad ngi lang baroh” pynkut ka kyrwoh na U Bah Auguster Jyrwa General Secretery ka KSU.
Phi don ban ong eiei?