Nongpoh: Ka metiap u rangbah kaba la lap hynnin ka miet na Wah Umpyrli Saiden, ka dei ka metiap u Bah Klai Mukhim, u rangbah uba la jah noh na la iing naduh ka 9 tarik mynta u bnai na ka jaka kaba u sah ha Pahamrinai.
Ia katei ka metiap kaba la lap nyngkong da ki nongkhwai doh kiba la leit khwai sha katei ka Wah, ha kaba ki la pyntip sha ki samla ka shnong Saiden bad kaba la pynlong ia ki samla na ka shnong Saiden ba kin leit mar mar sha katei ka jaka, kaba ki la lap ba katei ka metiap la song bha ha Byrni.
Haba la dep sei ia katei ka metiap, ki Pulit ki la rah noh sha ka jaka buh metiap ha Civil Hospital Nongpoh bad ka jingpynshisha ba utei u rangbah u dei u bah Klai Mukhim, ka dei tad haduh ban da wan kiba haiing, naduh ka lok bad ki khun ki kti.
Khlem artatien shuh ba utei u rangbah u la shah pyniap dusmon ha ki runar, ha kaba ki la bom da ki tiar na ka khlieh tad haduh ban da pra, nangta ki la pynlaw ia ki jain ki nep shwa ba kin thep ha Byrni Plastik bad ki sa leit ban bret ha katei ka wah.
Haba iadei bad katei ka jingjia shah pyniap utei u rangbah, ki pulit kin dang pynlong ia ka jingtohkit, na ka bynta ban iohkem ia ki runar kiba donkti ha katei ka kam pyniap briew.
Kum ban shu pynkynmaw hangne ba utei u rangbah, u la jah na la iing ha ka janmiet ka 9 tarik, ha kaba u la mih na la iing da kaba ong ba un leit thied duma, hynrei naduh katei hi ka por um shym la wanphai iing shuh.
Phi don ban ong eiei?