Dei ka jingngeit bakla, ba ki leit kam lehnoh:Mukul

Shillong, 15 Nohprah:
Ar tylli ki seng lehnoh Garo ka ANVC bad ka ANVC-B ki la wan aiti ialade ryngkat ki tiar ia siat hakhmat ka sorkar jylla mynta ka sngi. Ka ANVC ka dei ka seng lehnoh kaba la seng ha u snem 1994, bad ka la ia soi ia ka soskular sangeh ia siat bad ka sorkar pdeng ryngkat ka sorkar jylla ha ka 23 tarik u naitung 2004.
Hynrei ha katei ka por ba dang neh ka jingiasoi ka la mih ka jingiapait ia pra hapoh katei ka seng bad dei ha u snem 2010-11 ba la kha sa kawei pat ka seng lehnoh na ka ANVC kata ka ANVC-B. Katei ka kynhun ba dang mih thymmai ruh ka la ia soi ia ka soskular ia suk bad ka sorkar, bad naduh katei ka por la nang pynkhlain shuh shuh ia ka jingiateh hapdeng kitei ki ar seng bad ka sorkar.
La ia soi biang ia ka soskular ha Shillong ha ka 5 tarik u Kyllalyngkot 2012. Shuh shuh ha ka 18 tarik u nailur 2013, la khot biang ia kitei, ki ar seng ban ia wanrah ia ka thup kyrteng ki dkhot jong ki sha ka State Police Special Branch ban leh ia kiba donkam bad khadduh ka la poi ka jingiasoi soskular kaba kut noh artad ha ka 24 tarik u nailur 2014 ha New Delhi ha kaba la ia soi ryngkat bad u myntri pohing ka sorkar pdeng kumjuh ruh u myntri rangbah ka jylla u Dr.Mukul Sangma. Na katei ka jingiasoi ka la poi artad sha ka sngi ba mynta ha kaba kitei ki kynhun ki la wan ban mih shakhmat ryngkat ki tiar ialeh jong ki ban sangeh shisyndon ki kam pyntriem.
U Dr.Mukul Sangma, myntri rangbah u la pynpaw ka jingsngew sarong ha kaba kitei ki kynhun lehnoh ki la wan ban ia suk biang bad ka sorkar da kaba klet noh ia ki jingim barim jong ki hynrei ban phai sha ka imlang sahlang da ka dur kaba thymmai, kata na ki kam pyntriem sha ki kam ka imlang sahlang. U la ong ba ka dei ka jingngeit bakla jong ki, ba ki la shim ia ka lynti ki kam lehnoh. U la ong ruh ba ka jingwan pyndem jong ki ka dei ka jingkyrmen kaba khraw ba kan wan ka shongsuk shongsain ha ka jylla. Haba phai sha ki jingiasoi kiba dei na ka bynta ka jingiasyllok ban kyntiew ia ka jingdonkam ban kyrshan ialade, u la ong ba ka sorkar kan ialeh ban pynbun ia ki prokram kiba dei na bynta ki samla khnang ba kin lah ban thaw ia ki kam kiba ki lah ban ieng ha la ki jong ki kjat.