Dei ka jingleh donbor jong ki pulit, ka ba la poi shaduh ka jing kulmar ha Umiam PS:KSU

Shillong: Ka khasi student Union North Khasi Hill District hynnin ka sngi ka 26 tarik u risaw 2019 ka la khot ia ka jingialang ha Nongpoh halor ban pynshai ia ka jingjia ka ba la jia ha ka 15 tarik u Risaw 2019 ha ka ba u President ka KSU NKHD u la ktah kti ia ki pulit jong ka Umiam Police Station.

Ha ba ia kren bad ki lad pathai khubor na ka liang u General secretary ka KSU (NKHD) u Lambor Rymbai u la iathuh “Hadien ka to ka jingjia na ka liang ka seng ki la wad ia ka jingshisha, ia kaei kaba la pynlong ia u President ban ktah kti ia ki pulit ha umiam Police Station ka long ba ha ka 15 tarik u risaw mynmiet ki don ki dkhot jong ka KSU ki ba dang wan jing wan bad ki la sangeh ha Sumer ban ia bam ja, hynrei ha kato hi ka por ka don ka jingjia jing kulmar ha Sumer.”

U la bynrap“Hadien katto katne por la wan poi ki pulit na Umiam police station ha poh ka jing ialam jong u head constable D.Bordoloi ki la bat ia ki dkhot jong ngi, bad ki la shu kynnoh ba dei ma ki, ki ba la pynkulmarha ka ta ka jaka.”

U la ong ruh ba “Na ka liang u nongniah kata ka kali Pickup u ba kyrteng u Ahamet Ali uba la leit ban ujor ia ka jingkulmar u la pynshisha ba kim dei kine ki brew kia shoh bad pyn kulmar hynrei na ka liang u Head constable D.Bordoloi um shem la sngap, hynrei u la thep jubor ia ki ha kali bad na ka liang ki dkhot ka KSU kim shem la treh rung ha kali namar ba ki khlem leh eiei, hynrei na ka liang u Head constable D.Bordoloi la shu tim bad kren ruh da ki ktien khlemakor pyrshah ia ka seng bad u la pynbor ia u Amir Ali ban ujor ejhar pyrshah ia ki ne ki dkhot jong ka KSU.”

“Na ka liang jong ki dkhot ka seng ki la pyntip noh sha u President jong ka North Khasi Hills, haba la poi u la lap ba ki pulit ki la shu leh donbor bad ki la pynbor ia u Ahamet Ali ba u dei beit ban ujor ejhar pyrshah ia ki wat la na ka liang u Ahamet Ali, um shym la treh namar ba kim dei ma bad dei ka jingleh donbor jong ki pulit ka ba la poi shaduh ka jing kulmar ha Umiam PS” u la bynrap.

Kum ban shu pynkynmaw kat kum u bah C. Syrti,u SP ka Ri Bhoi, la ong ba katei ka jingjia ka la jia mynha ka miet jong ka 15 tarik mynta u Bnai, ha kaba utei u nongialam ka KSU ha Ri Bhoi, ha ryngkat bad kumba 25-30 ngut eiei ki samla, kiba la kam ialade ba ki dei ki dkhot ka KSU, ki la leit kynsan sha katei ka Thanad, da kaba leit kren khor bad ktah kti ia utei u OC bad Head Constable jong katei ka Umiam Police Station.

U bah C. Syrti, u la ong ba ka daw kaba la pynlong ia katei ka huri hura, ka dei tang na ka daw ba kawei ka Bolero Pick-up, kaba la niah da uwei u bar jylla, kam shem la ailad ia u ba un iaid shakhmat, ha kaba tang na kata ka daw, uwei na ki dkhot ka KSU, u la leit ban shoh ia utei u draibar ha kawei ka dukan bam ha Sumer.

U la iathuh ruh, ba ki Pulit hadien ba ki la ioh jingtip halor katei ka jingshah shoh, ki la leit sha katei ka jaka bad ki la rah noh sha Thanad ia utei u dkhot ka KSU bad ruh ia utei u nongniah jong katei ka Bolero Pick-up.

Kumta hadien ba ki Pulit ki la rah ia utei u dkhot ka KSU, u Samla Ferdynald Kharkamni lem bad ki dkhot ka KSU kiba la don kumba 25-30 ngut, ki la leit ban tur sha katei ka Thanad da ka jingdom bad ha katei ka por, la ong ba u la kren da ki kyntien khor pyrshah ia u OC bad ruh ia u Head Constable, namar ka jingkem jong ki ia u dkhot ka KSU, la ong u Bah C. Syrti.

Shuh shuh, u la ong ruh ba ynda ki la rung shapoh katei ka Thanad, ym tang ba u la sdang ban kren khor bad khlem da sngap shuh ia ka jingpynshai halor katei ka jingjia, pynban u la pyni bor da kaba ktah kti ia u OC bad ruh ia utei u Head Constable, kiba dang don ha la ka kam.

Kumta halor katei ka jingshah kynnoh ktah kti da utei u President ka KSU, ki Pulit katei ka Thanad, ki la dep ruh ban ujor da ka ejehar pyrshah ia u Samla Ferdynald Kharkamni, uba dei u President ka KSU, NKHD, ia kaba na ka liang ki Pulit ka Ri Bhoi ruh, ki la dep ba register ia ka case katkum ki kyndon ain, namarkata ka jingtohkit halor katei ka jingjia kan dang iaid shakhmat, u la bynrap.