Dei ka jingap lypa ban hiar thma ia ki briew jong ngi: Ardent

Shillong, 25 Naitung:
U Chief Executive Member (CEM) ka Khasi Hills Autonomous District Council (KHADC) u Bah Ardent Miller Basaiawmoit u la ong ba ka jinghiar thma ki runar ia ki briew jong ka Council ba khynra trading license ka dei kaba la pynap bad thmu lypa.
“Ka jinghiar thma ia ki nongtrei ka Council, ka dei kaba la thmu lypa. Kane ka dei kaba la pynbeit lypa da kito ki runar kiba bitar namar ka jingleh ka KHADC ia ki kam beain jongki”, la ong u Bah Basaiawmoit haba kren hynne ka sngi sha ki nongthoh khubor.
U la ong ba ki briew kiba leh ia ki kam runar ki la pyndonkam da ki tiar da ka jingthmu ban pynmyn saw ia ki nong trei ka Council.
“Kane ka dei ka jingjia kaba sngewsih namar ba ki nongtrei ka Council kiba pyndep ia la kamram, kin shah hiarthma bad shah pynmynsaw ha ki runar”, la ong u CEM ka KHADC.
Ka KHADC ka la ujor ejahar halor kane ka jingjia bad kito kiba donkti ki dei ban shah kem mardor ban pynshitom katkum ka ain.
“Nga kyntu ia ki pulit ban kem noh mardor ia ki bad nga la kren ia u SP ka East Khasi Hills halor kane”, la ong u CEM ka KHADC.
U la pynpaw ia ka jingsngew khia ia kane ka jingjia haba ki runar kim shym la map haduh ban hiar thma ia ki nongthoh khubor uba la mynsaw.
Kane ka jingjia kam nym pyntieng satia ia ka Council ba kan iaid shakhmat ban pyndep ia ka kamram. “ngin pynjur ia ka jingkhynra ia kiba pynkhein ia ka ain”, la ong u Bah Basaiawmoit.
“Ngin bteng beit ban khynra ia ki bar jylla kiba shong beain ha ki lynti iaid ha ki surok kiba leh ia ki kam khaii khlem da ioh ia ka jingbit na ka Council katkum ka Non-Tribal Regulation Act, 1954”, la ong u Bah Basaiawmoit.
U la ong ba ka Council ka la pynlong ia ka jingkhynra pyrshah ia ki bar jylla kiba shong die jingdie beain ha ki lynti iaid ha ki surok hadien ba la ioh ia ka jingujor na ki paidbah.
“Ngi la lap bad la iohi ruh da la kijong ki khmat ia ki bar jylla kiba shong die madan ha lynti iaid ha ki surok kaba la pynthut ia ka iaid ka ieng jong ki paidbah bad ka la wanrah ruh ia ka jingjaboh”, la ong u CEM ka KHADC.
Ha kane ka jingkhynra, la ioh ban pynkit haduh san trok ki tiar ba la kurup na thain Iewmawlong, Umsohsun, Motphran.