Dei ka Hima ba kwah pynkylla ia ka ain, ong u myntri barim

Shillong, 2 Nohprah:
U Myntri barim ka Hima Mylliem u Bah Mohen dro Rapsang u la ong ba ka jingpynkylla ia ka ain jong ka Hima Mylliem da ka KHADC ka dei hadien ba ka Hima ka la ai jingmut khnang ban ailad ia ki myntri ka Hima bad ki Longsan ban iashim bynta ha ka politik.
U Bah Rap sang uwei na ki myntri ba la hap ban iehnoh ia ka kam myntri na mar ka jingkhang ka ain ka KHADC shwa ka elekshon MLA 2013 namar u kwah ban iakhun elek shon. Haba ia kren bad u Ru pang, u Bah Rap sang u la ong ba ha ka jing shisha, kam ju don ka ain ha ka Hima shwa ka 2005 kaba khang ban iashim bynta ki myntri ha ka sain pyrthei hynrei dei ha utei u snem ba la pas ia ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) 2005.
Hynrei ha kane ka dorbar ba la dep shen, ka KHADC ka la pas ia ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) (Second Amendment) Bill, 2012 kala pynkylla ban ailad ia ki myntri, ki longsan ka Hima ban iashim bynta ha ka sain pyrthei.
“Ka jingpdiang ka KHADC ban pynkylla ia kane ka ain, ka long kaba dei eh namar ba, ha ka jingpyniaid kham mynshwa, dei tang u Syiem ba la shah teh ban nym shah ban iashim ha ka politik”, la ong u Bah Rapsang.
Ha kajuh ka por, u la kyntait ba ka politik kan treikam ha ki kam ka Hima namar ba la ailad ia ki Myntri, ki longsan ban iashim bynta ha ka politik. “Em ka politik, kam lah ban treikam ha ki kam ka Hima namar ba ia kano kano ka rai, la shim da ka dorbar ym da mano mano”, la ong u Bah Rapsang.
Lah ban kdew ba ka Executive Committee (EC) ka la thmu ban pynkylla ia ki kyndon jong kane ka ain ha u snem ba la dep ban ailad ia ki myntri ka Hima Mylliem ban iakhun elekshon hynrei namar ba ka sahteng, u kandidiet ka Congress na Shillong West u myntri Mohindro Rapsang u hap ban risain shwa ia ka kam myntri.
Katkum ka kyndon 20 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnongs of Mylliem Syiemship) Act, 2007, ki myntri kim lah ban iakhun elekshon ne ban shim bynta ha ka sain pyrthei.
Mynshem snem, hadien ba la pyrshah jur ki MDC, la pynbor ia ka Executive Committee (EC) ban phah biang ia kane ka Amendment bill sha ka Select Committee bad u bah Rapsang u la hap risain noh na ka kam myntri namar ba u kwah ban iakhun elekshon.