Dei ban thoh Niam Khasi ha ka khanasumari, ong u GS ka Seng Khihlang

Shillong: U General Secretary ka Seng Khihlang u bah Mario Biam, u la kyntu ia ki paidbah ba don ha ka niam tynrai ba ki dei ban thoh beit da ka ktien Niam Khasi ha ka phom (form) ka sorkar haba ka wan thoh ia ka khanasumari ne ka jingkhein briew.

Haba kren ha ka jingwanrah ia ka kaiphod ka seng ha ka lumpungbah kaba ha Mawngap myn hynnin ka sngi, u bah Mario u la kyntu ia kiba don ha ka niam tynrai ban thoh beit Khasi ha niam ha ka thup khanasumari jong ka sorkar namar ba haduh mynta, ki niam tynrai kim paw satia bad la shu thoh OTHERS ne Kiwei.
“Ka Seng Khihlang ka kyrpad sa shisien ba dei ban pyndap Niam Khasi ha ka phom ka Khanasumari ka sorkar. Kawei ka jaitbynriew, kawei ka Niam khnang ba ka kyrteng niam jong ngi kan paw ha ka jingthoh ha ka sokrar bad dei ban ai Khasi, kawei ka jaitbynriew bad kawei ka niam”, la u Rgh Mario.
U la ong ba kane ka dei ban long ka mynsiem jong iwei pa iwei bad kane ka dei ka jingkyrpad na ka seng Khihlang.
U Rgh Mario u la ong ruh ba kan donkam ba iakynduh lang ia iwei ia iwei, ban pynmih ia ki nongialam na kawei ka pateng sha kawei ka pateng namar ba ka Seng Khihlang ka duna bha ki nongialam ha ka kam seng bad kam niam bad kyrpad ia phi ban shim ia ki nongialam ha ka iing ha ka kut, ha ka seng bad ka jaitbynriew.