Dei ban thew khlem kriah, ki nongthied kim dei ban ot kilo

Shillong: Ka KHADC ka la shim khia ia ka jingud jong ki nongrep ba ki mahajon ki dei ban sangeh noh ka jingot kilo ia ki mar rep kum ki jhur ba la wanrah ban die ha Iewduh bad ki nongrep ruh kim dei ban thew lang bad ka kriah ne ka byrni.
U CEM ka KHADC mynta ka sngi, u bah Teinwel Dkhar u la ong ba ka Council ka sngew khia ia ka jingeh jong ki nongrep khamtam kumba kila wan ud ia ka jingshah ot kilo ia ki mar rep jongki ha Iewduh.
“Kawei kaba la ia rai ka long ba ki nongrep kin thew ia ki mar rep ha kaba kin theh, bad kin thew ia kriah ne ka khoh ne byrni ne kano kano ba thep mar bad lada don ki mar ba pyut, yn kyntait noh bad yn thew kilo ia ka kriah ne khoh ne byrni bad yn khate na ka kriah ia kiba pyut”, la ong u CEM.
Hynrei u CEM u la iathuh ba ki nongrep ki la ud ba nalor ba ki la weng ia ka kriah ne khoh ne byrni, ki mahajon ki dang ot kilo sa kumba 5-6 kilo bad kane ka la ktah jur ia ki nongrep kiba la trei shitom ban trei baroh shi snem kynthih.
“Ki nongrep kila ud ba nalor ba la weng ia ka kriah, la weng ia kiba pyut, ki dang ot sa 5-6 kilo. Na ka Council kan shim khia ha kaba la don ka Committee halor kane”, la ong u CEM.
U la ong ba ha ka jingshisha, la dep ia rai ha ka Council ba la kumno kumno dei ban pynduh pyndam noh ia kane ka jingot kilo ha kaba u Syiem bad ka Hima Mylliem ki la kular skhem ba la kumno kumno ym dei ban jia shuh ka jingot kilo.
Katba u EM ba peit ia ka iew, u bah Jambor War haba pyntip ia kane ka rai ha phyllaw ka KHADC ia ki nongrep ba ap hadien ba la iashong jingialang bad ki nongialam ka HFU mynta ka sngi, u la ong ba ka Council kam shym la iehnoh ia ki nongrep, hynrei kan pynthikna ba ia ka jingeh jongki, yn pynbeit noh shen.
“Ngi la thung ia ka Committee ba kyrpang ban peit ia kane ka jingeh. Ka jingiakren ka la wan sha ka jingiasngewthuh jingmut ha kaba ka Council kan sa shim khia ia kane ban khot biang ia ka Committee ia u Syiem bad ki Myntri ka Hima Mylliem nalor ki nongkitkam ka HFU”, la ong u bah Jambor.
U la ong, “Ba phin sngewhun ban leit phai, ba nga kwah ban ong hangne ba ngi la shim ia ka jingkitkhlieh namar ba ki rai la don bad kaba sah sa tang ban pyntreikam na ka bynta ka jingseisoh jong phi”.