Dei ban siew bai ding man u bnai, ong u Myntri

Shillong, 28 Nailar:
U working president ka UDP u Bah Paul Lyng doh u la ong ba u myntri ka tnad bording u Clement R Marak u la pynthi kna ha ki nongialam ka JAC mynta ka sngi, ba ka MeCEL ka dei ban pyn khreh bai siew ding man u bnai na hapoh 30 sngi, khnang ban pynsuk ia ki paidbah khamtam kito kiba duna jingioh.
“Ngi la pynpaw ha u myntri ka tnad bording ba ka rukom siew bai thang ding elektrik jong ka MeCEL kam long kaba iaid beit bad kaba biang. Ka MeCEL ka dei ban shim ia ki lad ki lynti ban pynbeit ia kane da kaba phah ia ka bai thang ding man u bnai, ym ban slem ia kata”, la ong u Bah Lyngdoh uba ialam ki rangbah shnong na sor bad na khapsor hapoh ka lama ka Joint Action Commitee (JAC).
Ha kajuh ka por, u working president ka UDP u la ong ba ki la rah ia ka mat kaba iadei bad ka jingsiew bai ding mar ia thew ia u meter kaba la wanrah ia ka jingkulmar ia ki paidbah na ki dong bapher bapher jong ka sorkar Shillong.
“Ngi tip ba don ki jingtreikam ba dkoh namar ba ka MeCEL ka la pyrshang ban wanrah ia ka rukom siew kaba thymmai. Hynrei ka MeECL ka dei ban pynthikna ba ki paidbah ba pyndonkam ding elektrik kim dei ban mad ia ki jingsuhsat”, la ong u Bah Lyngdoh.
U Bah Lyngdoh u la ong ba ka jingsiew bai ding elektrik dei ban leh man u bnai hapoh 30 sngi namar ba la lap ba ka jingsiew bai ding ka la poi haduh 40 haduh 50 sngi teng teng haduh 64 sngi bad kane ka la buh jingeh ia ki paidbah.
U la ong ba ia ka dor dei ban leh da kaba kdew haba sei ia ka dor na u mater khnang ban pynhun ia ki paidbah.
“Dei ban thep ia man ki Card Meter ha man ki thliew iing khnang ban pynlah ia ki trai ban peit ia ka jingiaid u meter”, la ong u Bah Lyngdoh.
La ai jingmut ruh ban buh ia ka Public Grievances Cell bad ka Complaint Cell ba la pynbiang de da ki tiar katkum kane ka juk mynta.
“Ia ki number jong ka ophis na ka bynta kane, dei ban pynbna paidbah bad kane ka Cell ka dei ban treikam san sngi ha ka shi bnai khnang ba ki paidbah kin lah ban thep ia ki jingujor haba shem ne lap ia kano kano”, la ong u Bah Lyngdoh.
La ai jingmut ruh ban buh kham bun ki jaka siew ha man ki shnong ha sor bad ha khapsor ban pynlait ia ki paidbah na ka ieng lain satar.
Halor ka jingpynbha ia ki ding surok ban ai jingshai mynmiet, la ai jingmut ba ka MeCEL ka dei ban ai kontrak ban peit ia kane ban pynbha khnang ban sted ka kam haba don kano kano ka jingsniew.