Dei ban pynbiang kot khyndew ki bor synshar hima, ong ka HYC

Shillong, 21 Iaiong:
Ka Hynniewtrep Youth Council (HYC) ka la kyntu ia ka KHADC ba kan hukum ia ki nongsynshar shnong, Raid, Hima ba kin pynbiang ia ki kot ki sla ki sakhi satar ha kaba iadei bad ka khyndew ka shyiap ban khlain ka jingkam ia ki jaka kiba iaknieh bad ka Assam. Mynta ka sngi, ki nongialam ka HYC kynthup u president Bah Peter Lawai ki la iakynduh ia u EM ka Eleka Bah Lamphrang Blah halor kane ka bynta.
“Ka District Council ka dei ka nongri ia ka khyndew ka shyiap katkum ka sixth Scheduled bad ka dei ban hukum ia ki Hima, bor shnong, Sordar shnong ban lum ia ki sakhi satar, ki kot ki sla bad ban lum lang ia ki bad ban aiti pat sha ka sorkar khnang ba ka jingkam ia ka jaka kan long kaba khlain na ka jingiaknieh bad ka Assam.
U la ong ba ka KHADC ka dei ban buh ia ka Record Finding Committee ban leh ia kane ka kam.
“Ki MDC kim dei ban lapmiet wad pisa ban shna lynti iaid kjat, bad kiwei ki kam hynrei ki dei ban sngewkhia ia ki kam kum ki MDC ban trei katkum ka sixth schedule” u la ong bah Lawai.