Dei ban peitngor ki kot khubor ia ka sorkar bad ki kompeni : Dr Nongkynrih

Shillong, 27 Naitung:
Ka Meghalaya Editors’ and Publishers’ Association (MEPA) ka la pynlong ia ka jingialang kut snem ha kane ka sngi Saitjain bad ha kane ka jingialang la pynlong ia ka jingiakren ia ki mat kiba bun kiba iadei bad ki kam jong ki nongthoh khubor bad kumno ban jop ia ki jingeh.
U Dr. A.K. Nongkyn rih u Professor ha Sociology Department, NEHU u la kren halor ki kam jong ki lad pathai khubor ha kine ki 43 snem ba la dep naduh ba la ioh ia ka jylla Meghalaya. U la ong ba ki lad pathai khubor ha Meghalaya ki la leh ia ka kam kum ki rishot basaw jong ka synshar paidbah kyrpang ha ka sain pyrthei hynrei donkam ba kin phaikhmat ruh ha ka liang ka ioh ka kot bad ka jingbatai ia ki polisi bapher bapher jong ka sorkar na ka bynta ka jingmyntoi jong ki paidbah. U la ong ba ka jingtreikam jong ki lad pathai khubor sha ki jaka nongkyndong ka long kaba duna bha.
U Dr Nongkynrih u la kyntu ia ki lad pathai khubor ban bteng ia ka jingpeitngor ia ka jingtreikam jong ka sorkar bad ki kompnei namar ba kine ki dei ar tylli kiba donbor tam ha kane ka juk mynta. U la ban jur ia ka jingdonkam ban sei ia ki jingshisha haba pynphriang ia ki khubor bad ban kiar na ki ktien tharai, hana kiba buh ia ka jingling artatien. U la kyntu ia ka MEPA ban bud ia ka jingtreikam da ka jingtbit bad shemphang.
Katba u President barim ka MEPA, u Manas Chaudhuri, u la pynpaw ia ka jingsngew khia ia ka jingkynduh jingeh jong ki lad pathai khubor ha Meghalaya. U la ai jingmut ban iatreilang iatylli ki lad pathai khubor barit khnang ban jop ia ki jingeh.
Ha kane ka jingialang la rai ruh ba ka tnad Meghalaya Information and Public Relations Department, ka sorkar Meghalaya ka dei ban thaw ia ka polisi kaba shai ha ka rukom sam jingpynbna sha ki lad pathai khubor. La ai jingmut ban buh ruh ia ka media committee ban peit ia kine ki jingeh ki nongthoh khubor ha ka jylla.
Ka Welfare Fund ia ki nongthoh khubor ka Journalist’ and Non- Journalists Welfare Scheme ban pynheh bad ban kynthup lang ia ki dkhot ka MEPA ha ka Selection Committee jong kane ka skhim. Ban ai jingiarap ia ki nongthoh khubor kiba iakynduh jingeh namar ki daw.
Ka jingialang ka MEPA ka la rai ruh ban ai ia ka jingiada ia ki nongthoh khubor kiba iakynduh jingeh namar ka jingshah byrngem ne shah pyndik haba ki trei ia ka kam.
Kan pynlong ruh ia ka jingai jinghikai ia ki nongthoh khubor ban pyntbit shuh shuh ha kane ka kam. Kan pan jingshai ruh na ka District Council kaba shim khajna na ki nongthoh khubor bad kan pynlong ruh ia ka jingpynshai halor ki kam ba iadei bad ka ain ka nun.